राजनीति

कांग्रेसको मतगणना अन्तिम चरणमा, दलिततर्फका ९ केन्द्रीय सदस्यमा देउवापक्षका ८ जना विजयी

• गाउँ सहर संवाददाता
• ८ पौष बिहीबार, २०७८ | १०:२१:०० मा प्रकाशित

काठमाडौं । नेपाली कांग्रेसमा समावेशी अन्तर्गत दलिततर्फ केन्द्रीय सदस्यको मतगणना सकिएको छ । बुधबार राति सम्पन्न मतगणना अनुसार दलिततर्फ खुलामा पाँच र महिलामा चार जना केन्द्रीय सदस्यमा निर्वाचित भएका हुन् ।

९ पदमध्ये ८ जनामा देउवापक्षका विजयी भएका छन् । पुरुषतर्फ एक जनामात्र इतरपक्षले जितेको छ । 

दलित पुरुषतर्फको केन्द्रीय सदस्यमा प्रकाश रसाइली स्नेही, नृपबहादुर वड, हरिशरण नेपाली, मैकुलाल वाल्मीकि र  मान बहादुर नेपाली विजयी भएका छन्। विजयीहरुमा स्नेही बाहेक सबै देउवा पक्षका हुन् । 

त्यस्तै महिलातर्फ चार जना पनि देउवा पक्षकै विजयी भएका छन् । दलित महिला तर्फ सुजाता परियार,रुपा विश्वकर्मा, लक्ष्मी परियार र शान्ति परियार विक केन्द्रीय सदस्यमा विजयी भएका छन् । 

मतगणना हिजै सक्ने तयारी भएको भए पनि नेपाल बार एसोसिएसनको 'बार डे' परेकाले गणकहरु आउँदा नसकिएको र आज धेरै स्थानमा गनेर मतगणनाको काम सम्पन्न गर्ने निर्वाचन समितिका सदस्य जगन्नाथ श्रेष्ठले जानकारी दिए । 

मंसिर २४-२७ सम्म भएको कांग्रेसको १४ औं महाधिवेशनमा १३४ पदका लागि निर्वाचन भएको थियो । बुधबारसम्म दलिततर्फसहित १०६ पदको मतपरिणाम सार्वजनिक भएको हो । निर्वाचन समितिका अनुसार अब आदिवासी जनजाती र खसआर्यतर्फ केन्द्रीय सदस्यको मतपरिणाम सार्वजनिक हुन बाँकी छ ।