अर्थतन्त्र

कृषि विकास बैंकद्वारा २१ प्रतिशत लाभांश वितरण गर्ने प्रस्ताव

काठमाडाैं । कृषि विकास बैंक लिमिटेडले गत आर्थिक वर्ष २०७७।७८ को मुनाफाबाट बैंकका शेयरधनीहरुलाई २१.०५२६ प्रतिशत लाभांश वितरण गर्ने प्रस्ताव गरेको छ ।

संस्थाको पुस १ गते, बिहीबार सम्पन्न सञ्चालक समितिको बैठकले चुक्ता पूँजीको २० प्रतिशत बोनस सेयर र कर प्रयोजनका लागि १.०५२६ प्रतिशत नगद गरी कुल २१.०५२६ प्रतिशत लाभांश वितरण गर्ने प्रस्ताव गरिएको कम्पनी सचिव हिमलाल पौडेलले जानकारी दिए ।

यस्तै नेपाल सरकारको हाल कायम भएको फिर्ता नहुने अग्राधिकार शेयर पूँजीमा समेत वार्षिक ६ प्रतिशतले हुने नगद लाभांश रकम समेत प्रदान गर्ने निर्णय गरेको उनले जानकारी दिए । सरकारले लगानी गरेको करिब साँढे पाँच अर्बको लगानीबाट हरेक वर्ष ६ प्रतिशत लाभांश लैजाने गरेको छ ।

बैंकले घोषणा गरेको लाभांश वाणिज्य बैंकहरुमा तेस्रो ठूलो लाभांश हो । नबिल बैंक र हिमालयन बैंकले मात्र कृषि विकास बैंकभन्दा धेरै लाभांश वितरण गर्ने प्रस्ताव गरेका छन् ।

बैंकले प्रस्ताव गरेको उक्त लाभांश नियामक निकाय नेपाल राष्ट्र बैंकबाट स्वीकृत भई बैंकको आगामी वार्षिक साधारण सभाले पारित गरेपश्चात मात्र लगानीकर्तामा वितरण हुनेछ ।

यसअघि अघिल्लो आर्थिक वर्ष २०७६/७७ बाट बैंकले प्रतिशत १५ बोनस सेयर र कर प्रयोजनका लागि ०.७८ प्रतिशत नगद लाभांश वितरण गरेको थियो । अघिल्लो आवको तुलनामा बैंकले प्रस्ताव गरेको लाभांश ५.२७ प्रतिशत बढी हो ।

गाउँ सहर संवाददाता

तपाईँको मत