राजनीति

कांग्रेस १४औँ महाधिवेशन : उम्मेदवारी फिर्ता लिने समय बढाइयो

• गाउँ सहर संवाददाता
• २६ मङ्सिर आइतबार, २०७८ | ११:४४:०० मा प्रकाशित

काठमाडाैं । कांग्रेसको १४औँ महाधिवेशनअन्तर्गत उम्मेदवारी फिर्ता लिने समय बढाइएको छ । आइतबार बिहान ११ बजेसम्म रहेको उम्मेदवारी फिर्ता लिने समय मध्याह्न साढे १२ बजेसम्म बढाइएको हो ।

कांग्रेस केन्द्रीय निर्वाचन समितिका सचिव जगन्नाथ श्रेष्ठले आइतबार सूचना जारी गर्दै आज साढे १२ बजेसम्म उम्मेदवारी फिर्ता लिन सकिने जनाएको हो। समितिको निर्णयबमोजिम उम्मेदवारहरुले आफ्नो उम्मेदवारी फिर्ता लिन चाहेमा फिर्ता लिने समय आज दिनको १२ः३० बजेसम्म कायम गरिएको सूचनामा उल्लेख गरिएको छ।

महाधिवेशनमा १३४ पदका लागि ५४८ जनाको उम्मेदवारी परेको छ । अहिलेसम्म प्रदेश २ क्लस्टरमा केन्द्रीय सदस्यमा उम्मेदवारी दिने जगीलाल यादवले आफ्नो उम्मेदवारी फिर्ता लिएका छन् । उनले उम्मेदवारी फिर्ता लिएसँगै प्रदेश २ बाट दुई जना केन्द्रीय सदस्य निर्विरोध निर्वाचित भएका छन् । आनन्दप्रसाद ढुंगाना र रमेश रिजाल केन्द्रीय सदस्यमा निर्विरोध निर्वाचित भएका हुन् ।

कांग्रेस सभापतिको लागि ६ जनाको उम्मेदवारी परेको छ । वर्तमान सभापति एवं प्रधानमन्त्री शेरबहादुर देउवा, उपसभापति विमलेन्द्र निधि, केन्द्रीय सदस्यहरु प्रकाशमान सिंह र शेखर कोइरालासँगै कल्याण गुरुङ र युवराज न्यौपाने सभापतिमा उम्मेदवारी दिएका हुन् ।

निर्वाचन समितिले उम्मेदवारी फिर्ता लिने समय सकिएपछि उम्मेदवारको अन्तिम नामावली प्रकाशन हुने जनाएको छ । महाधिवेशनअन्तर्गत मतदान भने सोमबार बिहान ८ बजेदेखि हुने निर्वाचन समितिले बताएको छ । मतदान राष्ट्रियसभा गृह, महेन्द्र पुलिस क्लब र भृकुटीमण्डपमा हुने व्यवस्था गरिएको छ। महाधिवेशनमा कांग्रेसका ४ हजार ७४३ महाधिवेशन प्रतिनिधिले मतदान गर्नेछन् ।