राजनीति

शिव हुमागाईकाे सह-महामन्त्रीमा दाबी, काभ्रेबाट सर्वसम्मत निर्णय

• गाउँ सहर संवाददाता
• २२ मङ्सिर बुधबार, २०७८ | १६:१४:०० मा प्रकाशित

काभ्रे । नेपाली कांग्रेसका केन्द्रीय सदस्य, श्रमिक एबम ट्रेड युनियन बिभागीय प्रमुख शिवप्रसाद हुमागाईले सह-महामन्त्री पदमा उम्मेद्वारी दिने भएका छन् । 

हुमागाई पार्टीको आसन्न १४औँ महाधिवेशनमा सहमहामन्त्री पदको उमेदवार बन्ने भएका छन् ।

जिल्ला कार्यसमिति काभ्रेको निर्णयसँगै आफू सहमहामन्त्रीको उमेदवार बन्ने हुमागाईंले गाउँसहरसँग बताए ।

आज बिहान सभापति तिर्थ लामाकाे सभापतित्वमा बसेको कांग्रेस काभ्रे जिल्ला कार्यसमितिको बैठकले हुमागाईंलाई सहमहामन्त्रीको सर्वसम्मत उमेदवार बनाउने निर्णय गरेको छ । हुमागाईं काभ्रेका हुन् ।

काभ्रे जिल्ला कार्यसमितिमा सभापति शेरबहादुर देउवा र नेता कृष्णप्रसाद सिटौलानिकट समूह विजयी भएको थियो । हुमागाईं सिटौलानिकट मानिन्छन् । कांग्रेस काभ्रेमा देउवानिकट सभापति छन् ।

श्रमिक एबम ट्रेड युनियन बिभागीय प्रमुखकाे रूपमा काम गरेकाले युवा र श्रमिककाे लागि सम्मानजनक राेजगारीकाे अवसर सिर्जना गर्न अहिलेकाे आवश्यक रहेकाे उनको भनाइ छ । राष्ट्रियता र जनजीविकाका मुद्दामा कांग्रेस खराे उत्रन आवश्यक रहेकाे बताउँदै सह-महामन्त्री पदकाे जिम्मेवारीमा रहेर काम गर्न चाहेकाेले पहिलेकाे भूमिकाको मूल्याङ्कन गर्दै सहमहामन्त्रीको जिम्मेवारी दिनुपर्ने उनको भनाइ छ ।