गाउँ सहर

बंगालकाे जवाद सामुन्द्रिक चक्रावत : नेपालमा अप्रत्यक्ष प्रभाव, सतर्कता अपनाउन अनुरोध

• गाउँ सहर संवाददाता
• १८ मङ्सिर शनिबार, २०७८ | ०८:२७:०० मा प्रकाशित

काठमाडाैँ । जल तथा मौसम विज्ञान विभाग मौसम पूर्वानुमान महाशाखा विशेष बुलेटिन २:  हिउँदे मौसमको अपडेट (Special Winter Bulletin 2) प्रकाशन गर्दै बंगालको खाडीको मध्य पश्चिम भू-भागमा हिजो (२०७८/०८/१७ गते) जवाद (JAWAD)  नामको सामुन्द्रिक चक्रवात बनेको बताएकाे छ ।

विभागका अनुसार सो चक्रवात आज विहान ओडिसाको तटिय क्षेत्रमा पुग्ने  र तत्पश्चात उत्तर उत्तर पूर्वतर्फ सर्ने देखिएको छ । सो चक्रवातका कारण नेपालमा खासै ठूलो प्रभाव पर्ने संभावना नरहेता पनि यसको अप्रत्यक्ष प्रभावले आज रातिबाट प्रदेश नं १, प्रदेश नं २ र बागमती प्रदेशमा आंशिक देखि सामान्य बदली भई सो प्रदेशका उच्च पहाडी तथा हिमाली भू-भागहरुका थोरै स्थानहरुमा हल्का हिमपातको संभावना रहेको छ भने सो प्रदेशका एक-दुई स्थानहरूमा हल्का वर्षाको संभावना रहेको छ ।

आउँदो सोमबारबाट क्रमशः यो प्रणालीको प्रभाव नेपालमा कम हुँदै जाने देखिन्छ ।

भोली आइतबारबाट पुनः अर्को पश्चिमी न्युन चापीय प्रणालीको प्रभाव देशमा पर्न सक्ने संभावना देखिएको छ । सो पश्चिमी न्यून चापिय प्रणालिको प्रभावले आइतबार देशको सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशमा सामान्य देखि पूर्णतया बदली भई केही स्थानहरूमा हल्का देखि मध्यम वर्षा र सो प्रदेशहरुको उच्च पहाडी तथा हिमाली भू-भागहरुमा हल्का देखि मध्यम हिमपातको संभावना रहेको छ।

सोमबार सो प्रणालीले देशभर प्रभाव पारी केही स्थानहरूमा हल्का देखि मध्यम वर्षा र उच्च पहाडी तथा हिमाली भू-भागहरुमा हल्का देखि मध्यम हिमपातको संभावना रहेको छ । आईतबार राति र सोमबार दिउँसो सो प्रणालीका कारण सुदूरपश्चिम प्रदेश, कर्णाली प्रदेश र गण्डकी प्रदेशको उच्च पहाडी तथा हिमाली भू-भागहरुका एक-दुई स्थानहरूमा भारी हिमपातको समेत संभावना रहेको छ । सो प्रणाली सोमबार रातिबाट कमजोर बन्दै जाने संभावना रहेको छ ।

विभागले भनेकाे छ- यी मौसमी प्रणालीहरुका कारण पर्वतारोहण, हवाई/यातायत लगायत दैनिक जनजीवनमा समेत असर पर्न सक्ने देखिएकोले चिसोबाट बच्न र हिमपातबाट हुन सक्ने प्रभावबाट जोगिन आवश्यक सतर्कता अपनाउनु हुन अनुरोध छ ।