गाउँ सहर

चिनियाँ नागरिकलाई ‘छुटाउँछु’ भन्दै ठगेको आरोपमा युवती प्रहरी नियन्त्रणमा

• गाउँ सहर संवाददाता
• १३ मङ्सिर सोमबार, २०७८ | १६:५८:०० मा प्रकाशित

काठमाडाैं । प्रहरीले चिनियाँ नागरिकलाई ‘छुटाउँछु’ भन्दै ठगेको आरोपमा एक युवती नियन्त्रणमा लिएकाे छ । डिल्लीबजार कारागारमा रहेका चिनियाँ नागरिकलाई ‘छुटाउँछु’ भनेर ठगेको आरोपमा प्रहरीले युवतीलाई नियन्त्रणमा लिएकाे हाे । काभ्रे घर भई काठमाडौंको सुकेधारा बस्दै आएकी २७ वर्षीया रबिना थापालाई पक्राउ गरिएको महानगरीय अपराध महाशाखाका एसपी कृष्ण प्रसाद पंगेनीले जानकारी दिएका छन् । 

बलात्कार उद्योग मुद्दामा ०७८ असार १८ मा पक्राउ परेका चिनियाँ नागरिक लिउ यु अहिले पुर्पक्षका लागी थुनामा छन् । थुनाबाट ‘छुटाउँछु’ भनेर रबिनाले चिनियाँ नागरिकको पत्नीसँग २० लाख ठगी गरेको प्रहरीको प्रारम्भिक अनुसन्धानबाट थाहा भएको छ । थापाले मञ्जु ओली समेतको सहयोगमा ‘न्यायाधीशसँग सेटिङ मिलाएर छुटाउँछु’ भनेर चिनियाँ नागरिककी पत्नी कमला भुसालसँग २० लाख रकम ठगेको एसपी पंगेनीले जनाए । 

महाशाखाको टोलीले थापालाई आइतबार साँझ छाउनीबाट पक्राउ गरेको हो । ठगीमा संलग्न अर्की आरोपी मञ्जु ओली फरार छिन् ।

ठगी मुद्दामा थप अनुसन्धान र कारवाहीका लागी थापालाई महानगरीय प्रहरी परिसर टेकुमा पठाइएको बताइएकाे छ ।