गाउँ सहर

आगलागीबाट मुगुको गमगढी बजारका २१ घर जलेर नष्ट, न दमकल न पानी (तस्बिरहरू)

काठमाडाैं । मुगुको सदरमुकाम गमगढीमा भीषण आगलागी भएको छ ।

गमगढीमा राति साढे १२ बजेदेखि आगो लाग्दा २१ वटा घर जलेर पूर्ण नष्ट भएको छ ।

प्रमुख जिल्ला अधिकारी रोमबहादुर महतका अनुसार अहिले आगो फैलनबाट रोके पनि पूरै आगो निभिनसकेको बताए ।

रातको समयमा आगो लाग्यो । साँघुरो बाटो, जोडिएका घर । दमकल छैन, पानीको अभाव । रातभर जलेका घर हेर्नु र रोइकराइ गर्नु पीडितको बाध्यता बन्यो ।

आगलागी भएको बजारमा माथि पानी नै पानीको खानी रहेको रारा ताल छ, तल कर्णाली नदी बगेको छ, तर जलेका घर निभाउन पानी भएन ।

महतकाअनुसार साँघुरो र बाक्लो बजारका कारण धेरै नोक्सानी भएको छ । आगलागीमा मानवीय क्षति भएको छैन ।

क्षतिको  पूर्ण विवरण आइसकेको छैन । 

तस्बिर- उमा मल्ल/हंश मल्ल

गाउँ सहर संवाददाता