अर्थतन्त्र

एनआईसी एशिया बैंकले रू. १ अर्ब १८ करोड ६ लाख कमायाे

काठमाडौँ । एनआईसी एशिया बैंकले चालू आवको पहिलो त्रैमासिक वित्तीय विवरण सोमवार सार्वजनिक गरेको छ ।

उक्त वित्तीय विवरण अनुसार कम्पनीको खुद नाफा गत आवको पहिलो त्रैमासको तुलनामा चालू आवको सोही अवधिमा १५ दशमलव ६३ प्रतिशत वृद्धि भएको छ । गत आवको पहिलो त्रैमासमा रू. १ अर्ब २ करोड १० लाख नाफा कमाएको उक्त कम्पनीले चालू आवको सोही अवधिमा वृद्धि गर्दै रू. १ अर्ब १८ करोड ६ लाख नाफा कमाएको छ ।

चालू आवको पहिलो त्रैमासमा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो । गत आवको पहिलो त्रैमासको तुलनामा चालू आवको सोही अवधिमा खुद ब्याज आम्दानी ४० प्रतिशत र सञ्चालन नाफा १४ प्रतिशत वृद्धि भएको छ ।

त्यसैगरी चालू आवको पहिलो त्रैमासमा कम्पनीको वितरणयोग्य नाफा रू. २२ करोड ४५ लाख २६ हजार रहेको छ । कम्पनीको चुक्तापूँजी रू. ११ अर्ब ५६ करोड ४० लाख रहेको छ ।

चालू आवको पहिलो त्रैमाससम्ममा कम्पनीले जगेडामा रू. ८ अर्ब २४ करोड ८० लाख ७० हजार र रिटेण्ड अर्निङमा रू. २ अर्ब १४ करोड ८० लाख २९ हजार सञ्चित गरेको छ ।

त्यसैगरी सो अवधिमा कम्पनीको प्रतिशेयर आम्दानी रू. ३९ दशमलव ६५,मूल्य आम्दानी अनुपात २१ दशमलव ४१ गुणा,तरलता अनुपात २० दशमलव १३ प्रतिशत र प्रतिशेयर नेटवर्थ रू. १८९ दशमलव ९ रहेको छ ।

गाउँ सहर संवाददाता