गाउँ सहर

नगरप्रमुख नभेटेपछि कर्मचारीलाई नै हिलो दलेर नगर परिक्रमा

• गाउँ सहर संवाददाता
• ४ कार्तिक बिहीबार, २०७८ | १५:०६:०० मा प्रकाशित

जनकपुरधाम । जनकपुरधाम उपमहानगरपालिकाका एकजना कर्मचारीलाई हिलो र मोसो दलेर नगर परिक्रमा गराएकाे छ ।

डा. सीके राउत नेतृत्वको जनतम पार्टीका कार्यकर्ताहरूले जनकपुरधाम उपमहानगरपालिकाभित्रको ढल व्यवस्थापनमा हेलचेक्र्याइँ गरेको भन्दै खानेपानी तथा ढल निकास कार्यालयका कर्मचारी राजेश्वर कुशवाहलाई बिहीबार दिउँसो शरीरमा हिलो र मोसो दलेर नगर परिक्रमा गराइएको हो ।

कर्मचारी कुशवाहलाई अर्धनग्न बनाएर नगर परिक्रमा गराइएको थियो । त्यसक्रममा सहभागी नेता–कार्यकर्ताहरूले प्रदेश सरकार र स्थानीय सरकाविरुद्ध चर्को नाराबाजी गरेका थिए ।

डा. राउतको सचिवालय अनुसार एक महिना पहिले नगरप्रमुख लालकिशोर साह र खानेपानी कार्यालयलाई ध्यानाकर्षण गराइएको थियो । आफ्नो मुद्दालाई बेवास्ता गरेको भन्दै जनमत पार्टीका नेता तथा कार्यकर्ताहरूले ‘कारबाही’स्वरूप हिलो दलेर नगर परिक्रमा गराएका हुन् ।