प्रतिनिधि सभा

हतार हतार बन्द गरिएकाे संसद अधिवेशन आह्वानमा एमसीसी प्राथमिकता

• गाउँ सहर संवाददाता
• २० भदौ आइतबार, २०७८ | ०९:१८:०० मा प्रकाशित

काठमाडाैं । नेपाल सरकारको मन्त्रिपरिषद् बैठकले गरेको सिफारिस अनुसार राष्ट्रपति विद्यादेवी भण्डारीले सङ्घीय संसद्का दुवै सदनको बैठक आह्वान गरेकी छन् । बैठक आगामी भदौ २३ गते बुधवार अपराह्न ४ बजे बस्ने गरी बोलाइएको हो ।

एक्कासी अन्त्य गरिएको अधिवेशन अमेरिकी मिलेनियम च्यालेन्ज कर्पोरेसन (एमसीसी) सँगको सम्झौता अनुमोदन गर्न चासो बढाइरहेको पृष्ठभूमिमा बोलाएको छ ।

सरकारले पारित गराउनुपर्ने १५ अध्यादेश पनि छन्, सबैभन्दा महत्त्वपूर्ण बजेट अध्यादेश नै पारित हुन बाँकी छ । बजेटसहितका अध्यादेशमा छलफल गराउने भनिए पनि सरकारको मुख्य चासो एमसीसीमै छ ।

प्रमुख प्रतिपक्षी एमालेले भने एमसीसी चाहिन्छ भन्ने माओवादी र पास गर्नुपर्छ भनेर सम्झौतामा हस्ताक्षर गर्ने कांग्रेस कसरी आउँछ त्यसपछि जवाफ तय गर्ने बताएको छ । एमाले अध्यक्ष केपी शर्मा ओलीले शनिबारमात्रै एमसीसी सम्झौता झुक्याएर पास गर्न खोजेको आरोप लगाएका छन् । तर सरकारको नेतृत्व गर्दा एमसीसी पास गर्नुपर्छ भनेर लागिपरेको एमालेले आगामी दिनमा यसबारे के गर्ने भन्ने तय गरिसकेको छैन ।

सत्तारुढ गठबन्धनमा रहेको माओवादीले भने एमसीसी संशोधनसहित पारित गर्नुपर्ने अडान राखिरहेको छ ।

नेता माधवकुमार नेपालले छुट्टै दलको हैसियत नपाउँदासम्म संसद्मा सरकारलाई बहुमत पुग्ने निश्चित थिएन । त्यसैकारण, चलिरहेको बजेट अधिवेशन गत साउन ३२ मा हठात् अन्त्य गरेर प्रधानमन्त्री देउवाले दल विभाजन सहज हुने अध्यादेश ल्याएका थिए । त्यसैका आधारमा एमाले वैधानिक रूपमा विभाजित भएको छ । अब भने सरकारको ध्यान एमसीसीतर्फ सोझिएको छ ।

बजेट अध्यादेश र एमसीसी सम्झौतासँगै नागरिकता विधेयक, निजामती सेवासम्बन्धी विधेयक, कारागारसम्बन्धी विधेयक संसद्मा‌ विचाराधीन छन् । संघीय संसद्को आगामी अधिवेशनबाट यी विधेयक र सम्झौता निर्णयार्थ प्रस्तुत हुने अपेक्षा गरिएको छ ।