दिगोविकास

पञ्चे बाजा बजाएर ताकेता गर्न थालेपछि काठमाडौं महानगरपालिकाकाे कर उठ्न थाल्याे

काठमाडाैं । काठमाडौं महानगरपालिकाले घर-पसल तथा महलमै गएर पञ्चे बजाएर सहितकाे टाेलीले कर तिर्न ताकेता गरेपछि व्यापारिक प्रतिष्ठानले कर बुझाउन थालेका छन् ।

महानगरपालिकाले कर बुझाउने आव्हानसहितको सूचना प्रकाशित गरी कर नबुझाउने प्रतिष्ठानहरुमा पञ्चेबाजसहित जान थालेपछि हालसम्म तीन करोड ८९ लाख रुपियाँ कर उठेको छ ।

घरजग्गा र सम्पत्ति कर सम्बन्धी सूचना प्रकाशित गरेपछि उक्त कर सङ्कलन भएको राजस्व विभागले जनाएको छ । राजस्व महाशाखा प्रमुख डा. शिवराज अधिकारीले दिनुभएको जानकारीअनुसार अहिलेसम्म १३ व्यापारिक प्रतिष्ठानले कर तिरेपनि पूरै कर नबुझाएको बताएका छन् ।

उनका अनुसार सम्पर्कमा आएको व्यापारिक प्रतिष्ठानमध्ये एन आर टी क्लब, यूनाइटेड वल्ड टे«ड सेन्टर, काठमाडौं इन्जिनियरिङ्ग कलेज, नेशनल हस्पिटल, शहीद मेमोरियल हस्पिटल, एलआरआई बोर्डिङ स्कुल स्युचाटार, होटल मस्र्याङ्दी, बुद्ध मल, जनमैत्री अस्पताल, सुरज आर्केट, वैशाली होटल प्रालि, प्रवीणबहादुर केसी र स्टार मलले कर बुझाएका हुन ।

एनआरटी क्लबले १० लाख, यूनाइटेड वल्र्ड ट्रेड सेन्टरले एक करोड, काठमाडौं, इन्जिनियरिङ्ग कलेजले २५ लाख, नेशनल हस्पिटलले २४ लाख, शहीद मेमोरियल हस्पिटलले २९ लाख २० हजार, एलआरआई बोर्डिङ स्कुलले २५ लाख, होटल मस्र्याङ्दीले आठ लाख सात हजार ९१८ पियाँ, बुद्ध मलले ४७ लाख १८ हजार र जनमैत्री अस्पतालले ६० लाख कर राजस्व विभागमा बुझाएको छ ।

यसैगरी सुरज आर्केटले ६ लाख ७४ हजार १६४, वैशाली होटलले पाँच लाख ९६ हजार ८६४, प्रवीणबहादुर केसीले आठ लाख र स्टार मलले ५० लाख कर बुझाएको विभागका प्रमुख अधिकारीले जानकारी दिए ।

यसैगरी काठमाडौं महानगरपालिकाले यही भदौ ९ गतेबाट कर असुल गर्न पञ्चेबाजासहित टोल टोलमा अभियान शुरु गरेको छ । महानगरले बक्यौता रकम असुल गर्न पटक–पटक सूचना सार्वजनिक गर्दा पनि सम्बन्धित निकाय सम्पर्कमा नआएपछि यस्तो तयारी थालेको हो । गत असार १६ गते पहिलो चरणमा र साउन २६ गते दोस्रो चरण गरी महानगरले कर नतिर्ने ठूला करदाताको नाम सार्वजनिक गरेको थियो । महानगरले यस अभियानबाट ७० करोड रुपियाँ असुल गर्ने लक्ष्य लिएको छ ।

गाउँ सहर संवाददाता

तपाईँको मत