वातावरण

कास्कीमा व्यवसायिक पशुपालक कृषकका ध्यान डाँले घाँसका विरुवातिर

कास्कीमा व्यवसायिक पशुपालक  कृषकका ध्यान डाँले घाँसका विरुवातिर

पोखरा । कास्कीमा व्यवसायिक पशुपालक  कृषकका ध्यान डाँले घाँसका विरुवातिर गएको पाइएको छ ।  डिभिजन बन कार्यालय कास्कीद्धारा सञ्चालित बन नर्सरीमा डाँलेघाँसका विरुवाको माग अत्याधिक बढेको छ । बैदेशिक रोजगारीबाट फर्केका युवावर्ग व्यवसायिक पशुपालनतर्फ लागेसँगै डाँलेघाँसका विरुवातिर ध्यान गएको हो ।

कोरोना कहरसँगै मुलुकमा व्यवसायिक पशुपालक कृषकको संख्या बढेकाले डिभिजन बन कार्यालय कास्कीले बाटुलेचौर, बन विज्ञान अध्ययन संस्थान, पोखरा महानगरपालिका वडा नं. ३० खुदीस्थित लेखनाथ सव डिभिजन वन कार्यालय, रानीवन र  कुँडहर सव डिभिजन बन कार्यालय परिसरमा स्थापित नर्सरीमा डालेघाँस लगायत, फलफुल तथा जडिवुटी र काठको लागि उपयोगी बिभिन्न जातका तीन लाख १८ हजार विरुवा उत्पादन गरी वितरण गरेको डिभिजन बन अधिकृत केदार बरालले जानकारी दिए ।

  बन नर्सरीमा उत्पादित राईखनियो, वडहर, टाँकी, इपिलइपिल, लगायतका एक लाख ५० हजार डाँलेघाँसका विरुवा निःशुल्क वितरण गरिएको  बरालले वताए ।

चालू आर्थिक बर्षमा घाँस र फलफुलका विरुवाको माग लिएर आउने अधिकांश युवा वर्ग रहेको बताउँदै उहाँले विदेशबाट फर्केका युवाको व्यवसायिक बाख्रापालनतर्फ आकर्षण बढेसंगै डाँलेघाँसका विरुवाको माग बढेको उनले वताए ।

लेखनाथ सव–डिभिजन बन कार्यालयका सहायक बन अधिकृत रामबहादुर विश्वकर्माका अनुसार नर्सरीमा जडिवुटी प्रजातिका कुरिलो,लेजपात, हर्रो, बर्रो, अमला लगायतका  १० हजार र निमारो, लप्सी, रिठ्ठा, गुलमोहर, राईखनियो, इपिलइपिल, नास्पति, हलुवावेद, अम्वा लगायतका ४० हजार विरुवा उत्पादन गरेर निःशुल्क वितरण गरिएको छ ।

पोखरा महानगरपालिका वडा नं. ३० द्धारा उपलव्ध गराईएको दुई रोपनी सार्वजनिक जग्गामा यसै बर्ष स्थापना गरी सञ्चालनमा आएको वन नर्सरीमा सबै भन्दा बढी डालेघाँसका विरुवाको माग भएको उनले वताए ।

संघ सरकारकारमार्पmत दुई लाख ४८ हजार ३३३ वटा विरुवा उत्पादनका लागि ३८ लाख रुपैया ससर्त अनुदान र गण्डकी प्रदेश सरकारबाट ६५ हजार विरुवा उत्पादनका लागि १२ लाख रुपैया प्राप्त भएको डिभिजन वन कार्यालय कास्कीका  सहायक वन अधिकृत कमल लम्सालले जानकारी दिए । यस बर्ष  गण्डकी प्रदेश सरकारले उपलव्ध गराएको थप दुई लाख रुपैया आर्थिक सहयोगले चारवटा नर्सरीबाट उत्पादित विरुवा कृषकलाई वितरण भई रहेका छन् । विरुवा उत्पादनका लागि प्रत्येक नर्सरीलाई ५० हजार रुपैयाका दरले उपलव्ध गराईएको थियो ।

गाउँ सहर संवाददाता

तपाईँको मत