राजनीति

'अरु साथीहरू गल्ती स्वीकारेर फर्कनुहुन्छ भने आउनुस् माधव नेपाललाई पार्टीमा कुनै ठाउँ छैन’- ओली

काठमाडौं । नेकपा एमालेका अध्यक्ष केपी शर्मा ओलीले माधवकुमार नेपाललगायतलाई पार्टीमा कुनै ठाउँ नभएको बताएका छन् । काठमाडौं जिल्ला कमिटीको बैठकमा शनिबार ओलीले उक्त कुरा बताएका हुन् । 

माधव नेपालसहित फ्लोर क्रस गर्ने एमालेका सांसदहरूलाई पनि पार्टीमा ठाउँ नभएको उनको भनाइ थियो । 'माधव नेपालजस्ता आन्दोलनविरोधीहरूलाई पार्टीमा कुनै ठाउँ छैन,' ओलीले भने ।

आफ्नो पार्टीको प्रधानमन्त्रीले विश्वासको मत माग्दा नदिने तर दक्षिणपन्थी सरकारलाई विश्वासको मत दिन फ्लोर क्रस गर्नेलाई पार्टीमा ठाउँ नभएको उनको भनाइ थियो । ‘आफ्नो पार्टीका प्रधानमन्त्रीले विश्वासको मत माग्दा नदिने, दक्षिण पन्थीको सरकारलाई विश्वासको मत दिन फ्लोर क्रस गर्ने,' ओलीले भने, 'त्यस्ताका लागि ठाउँ छैन ।’

पार्टीको सरकारविरुद्ध कुठाराघात भएको तथा अभियानले गम्भीर रूपमा ब्रेक लागेको ओलीको भनाइ थियो । बाटो बिराएकाहरू पार्टीमा फर्कन सक्ने भए पनि समयले भने नपर्खने टिप्पणी गरे । 'जो आउँदैन, आउँदैन । समय कुर्दैन,’ ओलीले भने ।

आफू नेतृत्वको सरकार ढलेर विकास र समृद्धिको सपनामा कुठाराघात भएको दाबी गर्दै ओलीले त्यसो गर्न भूमिका खेल्ने, फ्लोर क्रस गर्ने सांसदहरूलाई ठाउँ नभएको ओलीले बताएका हुन् ।

'एमाले भित्रका गद्दारलाई लिएर सरकार ढालेको' ओलीले आरोप लगाए । उनले बाटो बिराएका नेताहरू गल्ती स्वीकारेर पार्टीमा फर्किए ठाउँ रहेको बताए। 'अरु साथीहरू गल्ती स्वीकारेर फर्कनुहुन्छ भने आउनुस्, यो पार्टी हामी सबै मिलेर बनाएका हौं गल्ती भइहाल्यो भने पनि त्यसलाई सच्याउला,' उनले भने ।

ओलीले अबको निर्वाचनमा बहुमत ल्याउने जिकिर समेत गरे ।

गाउँ सहर संवाददाता