राजनीति

छानबिन समितिले सभापति देउवालाई बुझायाे आठ लाख ५२ हजार ७११ जनासहितकाे प्रतिवेदन

काठमाडौं । नेपाली कांग्रेसको क्रियाशील सदस्यता छानविन समितिले प्रतिवेदन बुझाएको छ । मंगलबार पार्टी सभापति शेरबहादुर देउवालाई समितिले क्रियाशील सदस्यताको प्रतिवेदन बुझाएको हो ।

समितिका अनुसार कांग्रेसमा क्रियाशील सदस्यको संख्या ८ लाख ५२ हजार ७११ पुगेको छ । रमेश लेखक संयोजक रहेको सात सदस्यीय समितिले करीब डेढ महिना लगाएर सदस्यताको काम सम्पन्न गरेका हो ।

८ लाख ५२ हजार क्रियाशील सदस्यताको विवरणसहितको प्रतिवेदन बुझाएपछि कांग्रेस केन्द्रीय सदस्यसमेत रहेका नेता लेखकले भने, ‘हामीले ७७ वटै जिल्लाको क्रियाशील सदस्यता नवीकरण र नयाँतर्फ ७५ जिल्लामा प्रवेश गरेर बुझाएका छौँ।’

समिति संयोजक लेखकले बारा र सप्तरीको क्रियाशील सदस्यता नवीकरण भएको तर नयाँ वितरण गरिएका क्रियाशील सदस्यता भने टुंगोमा पुग्न नसकेको जानकारी दिए ।

उनले भने, ‘बारा र सप्तरीमा नवीकरणको बारेमा टुंगो लगाएका छौँ। नयाँ क्रियाशीलको कागजात ढिलो प्राप्त भएकाले त्यो विषयमा प्रवेश गर्न सकेनौँ । धनुषा ४ नम्बर क्षेत्र र सर्लाही–२ मा टुंगोमा पुग्न नसकेकाले केन्द्रीय नेतृत्वलाई नै टुंगोमा पुग्न अनुरोध गरेका छौँ ।’

समितिले तयार गरेको प्रतिवेदनमा कांग्रेस केन्द्रीय सदस्य कल्याण गुरुङले फरक मत पेश गरेका छन् । तर विवाद भएका स्थानमा १३ औँ महाधिवेशनको क्रियाशील सदस्यताका आधारमा महाधिवेशन गर्ने निर्णय समितिले गरेको छ । नेता लेखकले भने, ‘प्रतिवेदन केन्द्रीय नेतृत्वसमक्ष प्रस्तुत गरेका छौँ । केही ठाउँ, केही निर्वाचन क्षेत्र र वडामा विवाद थियो । विवाद भएका स्थानमा नवीकरणतर्फ कै क्रियाशील सदस्यताले अधिवेशन गर्ने हामीले निर्णय गरेका छौँ । समितिमा सहमतिमै निर्णय भएको छ ।’

नेता लेखकले १३ औं महाधिवेशनमा ३३ वटा निर्वाचन क्षेत्रमा क्रियाशील सदस्यता टुंगोमा पुग्न नसकेको अवस्थामा अहिले भने केही स्थानमा मात्रै विवाद समाधान नभएको लेखकले जानकारी दिए ।

प्रदेशअनुसार यस्ताे छ तथ्याँक?

प्रदेश नम्बर १ मा एक लाख ७४ हजार सात सय ८२ जना क्रियाशील छन् ।

प्रदेश नम्बर २ मा एक लाख १२ हजार ९ सय ४६,

बागमती प्रदेशमा एक लाख ८६ हजार एक सय ४३,

गण्डकी प्रदेशमा एक लाख १८ हजार ६ सय ३३ जना,

लुम्बिनी प्रदेशमा एक लाख ३० हजार ८ सय ८५,

कर्णाली प्रदेशमा ५४ हजार ५ सय ६६ र

सुदुरपश्चिम प्रदेशमा ७४ हजार ७ सय ५६ जना क्रियाशील छन्।

गाउँ सहर संवाददाता

तपाईँको मत