गाउँ सहर

रामेछापमा मनोपरामर्श तालिम

• गाउँ सहर संवाददाता
• १७ असार बिहीबार, २०७८ | ०८:२५:०० मा प्रकाशित

रामेछाप । रामेछाप नगरपालिकाले तीनदिने मनाेपरामर्श तालिम सम्पन्न गरेकाे छ । कोरोनाको प्रकोपले समुदायमा पारेको मनोसामाजिक असरलाई मध्यनजर गर्दै नगरपालिका भित्रका अगुवा महिला, महिला स्वास्थ्यकर्मी तथा महिला जनप्रतिनिधिहरुलाई मनाेपरामर्श तालिम दिइएकाे हाे ।

कार्यक्रमको उद्घाटन गर्दै रामेछाप नगरपालिकाका उपमेयर सृजना खड्काले कोरोनाको महामारीले समुदायमा  मनोसामाजिक समस्यामा वृद्धि आएको र मानसिक स्बास्थ्यको क्षेत्रमा पनि कार्यक्रमहरु अगाडि बढाउनु अति जरुरी देखिएकाले अहिलेको असहज अबस्थामा पनि सामाजिक दुरी कायम गर्दै मनोपरामर्श तालिमको कार्यक्रम राख्नु परेको बताइन् ।

उनले मनोसामाजिक परामर्शका  कार्यक्रमहरु आगामी दिनहरुमा नगरपालिकाका  सबै वडाहरुमा संचालन गर्ने प्रतिबद्धता पनि जनाइन् । तालिमको सहजिकरण मनोविद् गोपाल ढकालले गरेका थिए ।

रामेछाप नगरपालिकाका कानुनी सल्लाहकार लोकहरि दाहालले घरेलु हिंसा, यौन दुर्व्यवहार, अपराधका कतिपय  घटनाहरु मनोसामाजिक समस्या तथा मानसिक रोगका कारणले पनि हुने भएकाले मानसिक स्वास्थ्यमा ध्यान दिनुपर्ने बताए ।

कार्यक्रमको समापन गर्दै नगरपालिकाका प्रमुख प्रशासकीय अघिकृत रामचन्द्र लामगादेले अहिलेको अबस्थामा  कार्यक्रम अति नै समय सान्दर्भिक भएको, रामेछाप नगरपालिकाभित्र पहिलो पटक यस्तो प्रकारको तालिमको आयोजना गरिएको र आगमी दिनमा यस्ता कार्यक्रमहरु निरन्तर रुपमा गर्नु आवश्यकता रहेकाे औँल्याए ।

कार्यक्रममा पचास जना भन्दा बढिको सहभागीता रहेको थियो ।