गाउँ सहर

गण्डकीको बजेटमा खोपलाई पहिलो प्राथमिकतामा राख्न माग

• गाउँ सहर संवाददाता
• ३० जेठ आइतबार, २०७८ | २०:४१:०० मा प्रकाशित

पोखरा । गण्डकी प्रदेशका मुख्यमन्त्री कृष्णचन्द्र पोखरेल नेपालीसँग बजेटमा खोपलाई पहिलो प्राथमिकतामा राख्न नेपाली काँग्रेस कास्कीका पदाधिकारी र क्षेत्रीय सभापतिले माग गरेका छन् ।

आइतबार कास्की काँग्रेसका सभापति कृष्ण केसी नेतृत्वको टोलीले मुख्यमन्त्रीलाई बधाई ज्ञापन गरी केही सुझाव समेत दिएको प्रवक्ता नवीन सिग्देलले जानकारी दिए ।

कास्की काँग्रेसका सभापति केसीले कोरोना महामारीका कारण जनता समस्यामा रहेकाले जनताका लागि अत्यावश्यक कार्यक्रमलाई आगामी बजेटमा प्राथमिकता दिन आग्रह गरे ।

यतिबेला कोभिड विरुद्वको खोप पहिलो प्राथमिकता हो, उनले भने– गण्डकी प्रदेशका नागरिकलाई खोप दिन सक्ने गरी बजेट व्यवस्था गर्न आवश्यक छ ।’

सभापति केसीले कोरोनाबाट प्रभावित व्यवसायी, शिक्षक, मजुदर लगायतका क्षेत्रलाई राहत हुने गरी कार्यक्रम ल्याउन पनि अनुरोध गरेका थिए ।

सभापति केसीसहित उपसभापति आइ बहादुर गुरुङ, सचिव देवेन्द्र रानाभाट, कोषाध्यक्ष लक्ष्मी पाण्डे, सहसचिव रङ्गिला आचार्य, प्रवक्ता नवीन सिग्देल, क्षेत्र नं २ का सभापति माधव बास्तोला ‘मधु’ र क्षेत्र नं ३ का सभापति पोषनाथ शर्माको टोली पुगेर मुख्यमन्त्रीलाई बधाई ज्ञापन गर्दै आफ्ना माग राखेका थिए ।