राजनीति

गिट्टी, बालुवा निकासी भारतलाई रिझाउने राष्ट्रहीत विरोधी कदम : विपक्षी गठबन्धन

• गाउँ सहर संवाददाता
• २२ जेठ शनिबार, २०७८ | २०:५६:०० मा प्रकाशित

काठमाडौं । गिट्टी, बालुवा र ढुंगा निकासी खुला गर्ने सरकारको निर्णय तत्काल खारेज गर्न विपक्षी गठबन्धनले माग गरेका छन् । यो सत्ता टिकाउन भारतलाई रिझाउने राष्ट्रहीत विरोधी कदम भएको उनीहरुको ठहर छ ।

शनिबार संयुक्त रुपमा विज्ञप्ति जारी गरी विपक्षी दलहरूले बजेटमार्फत् ल्याइएको उक्त घोषणाले तराई क्षेत्रलाई मरूभूमिकरण गर्ने बताएको छ ।

नेपाली कांग्रेसका सभापति शेबरहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एमाले नेता माधवकुमार नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाकी उपाध्यक्ष दुर्गा पौडेलद्वारा हस्ताक्षरित विज्ञप्तिमा भनिएको छ, ‘यो नेपालको तराई क्षेत्रलाई मरुभूमिकरण गर्ने र त्यहाँका वासिन्दाहरुलाई बाढी, डुबान र पानीको श्रोत सुक्ने समस्यामा पार्दै जनजीवनलाई नै जोखिमयुक्त बनाउने राष्ट्रघाती र जनघाती घोषणा हो ।’

अघि भनेका छन्, ‘वस्तुत यो सत्ता टिकाउनका लागि कसैलाई रिझाउने र राष्ट्रिय स्रोतलाई निहीत स्वार्थ साधनका लागि दुरुपयोग गर्ने राष्ट्रहित विरोधी निर्णय हो ।’

त्यस्तै, गठबन्धनले आयोडिन नुनमा कसैलाई फाइदा पुर्‍याउने र कमिशन तथा नाफाखोरीलाई प्रश्रय दिन खोजिएको भन्दै बजेटमा उल्लेखित उक्त व्यवस्था फिर्ता लिन माग गरेको छ ।