गाउँ सहर

चुनौति पार गरेर अघि बढ्ने संकल्प गर्न देउवाद्वारा गणतन्त्र दिवसको शुभकामना

• गाउँ सहर संवाददाता
• १५ जेठ शनिबार, २०७८ | ०९:३४:०० मा प्रकाशित

काठमाडौं । नेपाली कांग्रेसका सभापति शेरबहादुर देउवाले राष्ट्रपति र प्रधानमन्त्रीकै संस्कार र व्यवहार राज्य प्रणाली अनुरुप नभएको टिप्पणी गरेका छन् । गणतन्त्र दिवसको अवसरमा शुभकामना दिँदै देउवाले चुनौति पार गरेर अघि बढ्ने संकल्प गर्न अपिल गरेका छन् ।
 
“कुनै पनि राज्य प्रणालीको सफलता त्यसको नेतृत्व गर्ने शासकको चरित्र र व्यवाहारमा निर्भर हुन्छ । लोकतान्त्रिक गणतन्त्रको सफलताका लागि हाम्रो शैली र व्यवहार निरन्तर समीक्षाको विषय बन्दछ र बन्नु पर्दछ । देशको राष्ट्रपति र प्रधानमन्त्रीकै संस्कार र व्यवहार तदनुकूलको बन्न नसक्दा त्यसको दुश्परिणाम देशले भोग्नुपर्ने हुन्छ र आज हामी त्यो भोगिरहेका छौं । अतः गणतन्त्र दिवसको यो मितिमा यसप्रति गम्भीरता राख्न र यो चुनौती पार गरेर अघि बढ्ने संकल्प गर्न म समस्त नेपालीमा अपिल गर्दछु” विज्ञप्तिमा भनिएको छ ।

उनले संविधानको संरक्षण र संघीय लोकतान्त्रिक गणतन्त्रात्मक शासन व्यवस्थाको संस्थागत विकास गरेर मुलुकलाई आर्थिक समृद्धिको मार्गमा अग्रसर गराउँदै लोकतान्त्रिक संस्कार, संस्कृति, मूल्य र मान्यतामा आधारित समतामूलक समाजको निर्माण गर्न यो गणतन्त्र दिवसले प्रेरणा दिने विश्वास पनि व्यक्त गरेका छन् ।

साथै कोभिड–१९ को महामारीका कारण देश अहिले कठिन र संवेदनशील परिस्थितिको सामना गरिरहे पनि जनताको जीवनप्रति सरकार उदासिन र सवेदनहीन देखिएको उनको आरोप छ ।