अर्थतन्त्र

नेप्से ३५ अंकले घट्दा के के भए ?

• गाउँ सहर संवाददाता
• ५ बैशाख आइतबार, २०७८ | १६:०७:०० मा प्रकाशित

काठमाडाैं । साताकाे पहिलाे दिन नेप्सेमा गिरावट आएकाे छ । निरन्तर चार कारोबार दिनको वृद्धिपछि आज ३५.८९ अंक घटेर २६९९.५१ विन्दुमा झरेको छ ।

यो दिन १ करोड ९५ लाख २८ हजार ६५६ कित्ता सेयर ८ अर्ब ८० करोड १८ लाख ३ हजार २१५ रुपैयाँमा कारोबार भएको छ । यो दिन ४४ वटा कम्पनीको सेयर मूल्य बढ्दा १५७ वटा कम्पनीको सेयर मूल्य घटेको छ । साथै ६ वटा कम्पनीको सेयर मूल्य भने स्थिर छ ।

नेप्से ओरालो लागेपनि यस दिन कारोबार रकम भने केही बढेको छ । गत साताको अन्तिम कारोबार दिन ८ अर्ब ६३ करोड रुपैयाँ बराबरको शेयर खरिदबिक्री भएको बजारमा यस दिन २०७ कम्पनीको ९३ हजार ५६८ पटकको कारोबारमा ८ अर्ब ८० करोड १८ लाख ३ हजार रुपैयाँ बराबरको १ करोड ९५ लाख २८ हजार कित्ता शेयर खरिदबिक्री भएको छ ।

यस दिन महिला लघुवित्त वित्तीय संस्था, ज्योति लाइफ इन्स्योरेन्स र दिव्यश्वरी हाइड्रोपावरको शेयर सकारात्मक सर्किट लेभलमा कारोबार भएको छ । त्यसैगरी गुडविल फाइनान्सको शेयरमूल्य भने यस दिन ५ प्रतिशतभन्दा बढी घटेको छ ।

कारोबार रकमका आधारमा यस दिन एभरेष्ट बैंक लिमिटेड शीर्ष स्थानमा रहेको छ । सो बैंकको यस दिन ८७ करोड ६२ लाख ९९ हजार रुपैयाँ बराबरको शेयर खरिदबिक्री भएको छ । त्यसैगरी, यस दिन एनआईसी एशिया लघुवित्त वित्तीय संस्थाको ५५ करोड रुपैयाँभन्दा बढीको शेयर कारोबार भएको छ ।