खेल

भोटेकोशीमा भलिबल प्रतियोगिता हुने

काठमाडौं । सिन्धुपाल्चाेककाे भोटेकोशीमा राष्ट्रिय महिला भलिबल प्रतियोगिता हुने भएको छ ।

भोटेकोशी गाउँपालिकाको आयोजनामा ‘भोटेकोशी गाउँपालिका अध्यक्ष कप राष्ट्रिय महिला भलिबल प्रतियोगिता’ हुने भएको हो ।

बैशाख ८ गतेदेखि ११ गतेसम्म हुने प्रतियोगिता गाउँपालिकाको २ वडास्थित तातोपानी आधारभूत विद्यालयको खेल मैदानमा संचालन हुने आयोजकले बुधबार पत्रकार सम्मेलनमार्फत जानकारी दिएको छ ।

प्रतियोगितामा तीन विभागीयसहित ६ टिमको सहभागिता रहनेछ ।

लिगकप नकाउटका आधारमा खेलाइने प्रतियोगितामा विभागिय टिम एपीएफ, आर्मी र पुलिस तथा न्यू डायमण्ड क्लब, ढाेरपाटन प्रशिक्षण केन्द्र र सिन्धुपाल्चोक भलिबल संघको टोलीले प्रतिस्पर्धा गर्नेछन् ।

प्रतियोगिताको विजेता टोलीले तीन लाख तथा उपविजेताले दुई लाख पुरस्कार रकम प्राप्त गर्नेछ ।

त्यस्तै तृतीय हुने टोलीले एक लाख र चौथो हुनेले ५० हजार प्राप्त गर्नेछ ।

प्रतियोगिताको सर्वोत्कृष्ट खेलाडीले २० हजार प्राप्त गर्नेछ ।

प्रत्येक खेलको प्लेयर अफ दि म्याचले दुई हजार पाउने छ । प्रतियोगिताको उत्कृष्ट स्पाइकर, उत्कृष्ट सर्भर, उत्कृष्ट लिवेरो, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले समान ७–७ हजार प्राप्त गर्ने छन् ।

प्रतियोगिताको कुल लागत खर्च २८ लाख अनुमान गरिएकोमा २३ लाख जुटिसकेको आयोजकले नजाएको छ ।

गाउँ सहर संवाददाता

तपाईँको मत