अर्थतन्त्र

मध्य भोटेकोशीः आईपीओमा अन्तिम दिनसम्म ४ दशमलव ५६ गुणा बढी आवेदन

काठमाडौँ । मध्य भोटेकोशी जलविद्युत् कम्पनी लिमिटेडको आईपीओमा अन्तिम दिनसम्ममा मागभन्दा ४ दशमलव ५६ गुणाले बढी आवेदन परेको छ ।

सीडीएससीका अनुसार कम्पनीको आईपीओमा  सोमवार साँझ ५ बजेसम्ममा २४ लाख ७६ हजार ४८१ आवेदकबाट ३ करोड ७३ लाख ४८ हजार ४० कित्ता शेयरका लागि आवेदन परेको छ, जुन मागभन्दा ४ दशमलव ५६ गुणाले बढी हो ।

कम्पनीले गत असोज २० गतेबाट कुल ९० करोड रुपैयाँबराबरको आईपीओ निष्कासन गरेको थियो । जसअनुसार कम्पनीले १०० रुपैयाँ अंकित दरका कुल ९० लाख कित्ता आईपीओ निष्कासन गरेको थियो । यो आईपीओमा सोमवार बैंकिङ समयसम्म आवेदन दिन सकिने व्यवस्था गरिएको थियो ।

कम्पनीको आईपीओलाई केयर रेटिङ नेपालले वित्तीय दायित्व पूरा गर्ने सम्बन्धमा मध्यम जोखिम रहेको संकेत गर्ने केयरएनपी डबल बी आईएस रेटिङ प्रदान गरेको छ ।

आर्थिक वर्ष ०७६/ ७७ सम्मको वास्तविक वित्तीय विवरण अनुसार कम्पनी रू. ५ करोड ५० लाखभन्दा बढी नोक्सानीमा रहेको छ । उक्त अवधिसम्म कम्पनीको प्रतिशेयर नेटवर्थ रू. ९४ दशमलव ३९ रहेको छ । प्रतिशेयर आम्दानी भने रू. १ दशमलव २२ ऋणात्मक छ ।

गाउँ सहर संवाददाता