खेल

त्रि–देशिय अन्तराष्ट्रिय फुटबल प्रतियोगिता आजबाट रंगशालामा, दर्शकका लागि मास्क अनिवार्य

• गाउँ सहर संवाददाता
• १० चैत मंगलबार, २०७७ | ०९:११:०० मा प्रकाशित

काठमाडौं । अखिल नेपाल फुटबल संघ (एन्फा) को आयोजनामा त्रि–देशिय अन्तराष्ट्रिय फुटबल प्रतियोगिता आजबाट सुरु हुँदैछ ।

त्रिपुरेश्वरस्थित दशरथ रंगशालामा आयोजना हुने थ्री नेसन्स कपमा नेपाल, बंगलादेश र किर्गिस्तानले प्रतिस्पर्धा गर्ने छन् ।

त्रि–देशिय कपको उद्घाटन खेलमा आज बंगलादेश र किर्गिस्तानको यू-२३ टिम भिड्ने छन् । बंगलादेश र किर्गिस्तानबीचको खेल साँझ ५:३० बजे सुरु हुनेछ ।

फुटबल प्रतियोगिता हेर्न दर्शकका लागि मास्क र सेनिटाइजर अनिवार्य गरिएको छ ।  अखिल नेपाल फुटबल संघ (एन्फा)ले सोमबार बिज्ञप्ती जारी गर्दै त्रिदेशिय फुटबल हेर्न दर्शकलाई मास्क र सेनिटाइजर अनिवार्य गरेको हो ।

कोरोना भाइरसको महामारीको खतरा देखिएकाे उल्लेख गर्दै स्वास्थ्य सुरक्षा मापदण्ड अनुसार मास्कर र सेनिटाइजर अनिवार्य गरिएको एन्फाले जनाएको छ ।

प्रवक्ता किरण राईका अनुसार दर्शकका लागि तापक्रम नाप्ने, सेनिटाइजर अनिवार्य लगाउनुपर्ने, भौतिक तथा सामाजिक दुरी कायम गर्ने र मास्क अनिवार्य प्रयोग गर्ने सहितका मापदण्ड अनिवार्य गरेको छ ।

आजकाे खेलमा बंगलादेश र किर्गिस्तान दुबै टिम जित निकाल्ने लक्ष्यसहित मैदान उत्रने छन् । दुबै टिमका प्रशिक्षकले उपाधि जित्ने लक्ष्य रहेको बताईसकेका छन् ।

नेपालले भने पहिलो खेलमा बुधबार किर्गिस्तानसँग खेल्नेछ ।

दोस्रो खेलमा नेपालले बंगलादेशसँग खेल्नेछ । नेपाल र बंगलादेशबीचको खेल चैत १४ गते हुनेछ ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

फाइनल खेल चैत १६ गते हुनेछ ।