वातावरण

आजदेखि दिउँसाे गर्मी हुने, काठमाडाैंमा बिहानकाे न्यूनतम तापक्रम १ डिग्री सेल्सियस

• गाउँ सहर संवाददाता
• २५ माघ आइतबार, २०७७ | ०७:३६:०० मा प्रकाशित

काठमाडाैं । हाल देशमा पश्चिमी न्यून चापीय प्रणालीको आंशिक प्रभाव रहेको छ । पश्चिमी वायुको प्रभावले बदली भएको मौसममा आजदेखि सुधार आउने भएको छ । 

शनिवार काठमाडाैं उपत्यका लगायत उच्च हिमाली भेगमा हिउँ परेकाे छ । हिमपातका कारण अहिले काठमाडाैंसहित देशका धेरै ठाउँमा चिसो छ । 

आज काठमाडाैंको न्यूनतम तापक्रम १ डिग्री सेल्सियस मापन गरिएको छ । अहिले चिसो भए पनि तापक्रम बिस्तारै बढ्दै जाने मौसमविद्ले जनाएका छन् । 

हिजाे काठमाडाैं उपत्यका वरपरका शिवपुरी, चन्द्रागिरी, फूलचोकीसहित नगरकोट क्षेत्रमा हिजो हिउँ परेको छ । 

त्यसैगरि मकवानपुरको दामन र पालुङ, दोलखाको कालीन्चोकसहित गौरीशङ्कर संरक्षण क्षेत्रका विभिन्न ठाउँ, रामेछापकाे शैलुङ्ग, गाल्बा, सुनापति र सिन्धुपाल्चोकका हिमाली क्षेत्रमा पनि हिउँ परेको छ । 

सुदूरपश्चिमका हिमाली जिल्लामा भने गएको बिहीवार, शुक्रवारदेखि नै हिमपात सुरु भएको थियो । पश्चिमी वायुको प्रभावका कारण हिमपात र केही ठाउँमा हल्का वर्षा भएको मौसमविद्ले बताएका छन् । 

अब केही दिन उपत्यकासहित देशका धेरै ठाउँमा दिउँसोको समयमा गर्मी बढ्ने अनुमान गरिएको छ । तर, अहिले बाक्लो हिमपात भएको ठाउँ र तराईका केही जिल्लामा भने केही दिन चिसो नै हुने अनुमान छ ।