खेल

कप्तान रोहितकाे ७५ रनको योगदानमा ओमानसामु २ सय ३० रनको लक्ष्य प्रस्तुत

• गाउँ सहर संवाददाता
• ३ बैशाख मंगलबार, २०७६ | ११:३१:०० मा प्रकाशित

काठमाडाैं ।  यू–१९ विश्वकप क्रिकेटको एसियाली छनोटमा आज नेपालले ओमानसँग प्रतिस्पर्धा गरिरहेको छ । आफ्नो चौथो खेलमा नेपालले ओमानसामु २ सय ३० रनको लक्ष्य प्रस्तुत गरेको छ ।

टस हारेर पहिले ब्याटिङ गरेको नेपालले कप्तान रोहितकुमार पौडेलको अर्धशतक मद्दतमा ४३.२ ओभरमा २२९ रनको स्कोर खडा गरेकाे हाे ।

नेपालका लागि कप्तान रोहित कुमार पौडेलले सर्वाधिक ७५ रनको योगदान दिए । उनले यसक्रममा ४ चौका र २ छक्का हिर्काए ।

उनलाई भीम सार्कीले ३९ रन बनाउँदै राम्रो साथ दिए । उनले ४३ बलमा २ चौका र एक छक्का हिर्काए । ब्याटिङमा नेपालको सुरुवात राम्रो हुन सकेन । टिमको स्कोर १२ हुँदा ओपनर पवन सर्राफ व्यक्तिगत ५ रन बनाएर आउट भए । अर्का ओपनर रित गौतम पनि २१ बल खेलेर १० रन मात्रै बनाई आउट हुँदा नेपालको स्कोर ३३ रन थियो ।

अभिषेक बस्नेतले १५ रनको योगदान दिए । ओमानका लागि मुजाहिर राजा, आजम अलि, सञ्जय रवीन्द्र र जिल तन्नाले २–२ विकेट बाँडेका लिए ।

हालसम्म नेपालले दुई खेलमा जीत र एक खेलमा हार बेहोर्दै समूहको दोस्रो स्थानमा रहेको छ ।