अर्थतन्त्र

१० महिनामा साढे १३ खर्ब रेमिट्यान्स भित्रियो

• गाउँ सहर संवाददाता
• २७ जेठ मंगलबार, २०८२ | १२:३६:०० मा प्रकाशित

काठमाडौं । आर्थिक वर्ष २०८१/८२ को दश महिनामा विप्रेषण (रेमिट्यान्स) आप्रवाह  १३.२ प्रतिशतले वृद्धि भएको छ । चालु आवको वैशाख मसान्तसम्म १३ खर्ब ५६ अर्ब ६१ करोड रुपैयाँ रेमिट्यान्स भित्रिएको नेपाल राष्ट्र बैंकले जनाएको छ । 

अघिल्लो वर्षको सोही अवधिमा नेपाल भित्रने रेमिट्यान्स १६.९ प्रतिशतले बढेको थियो । २०८२ वैशाख महिनामा मात्रै १ खर्ब ६५ अर्ब ३० करोड रुपैयाँ रेमिट्यान्स भित्रिएको छ । अघिल्लो वर्षको सोही महिनामा १ खर्ब १५ अर्ब ९९ करोड रुपैयाँ भित्रिएको राष्ट्र बैंकको तथ्यांकमा उल्लेख छ ।

पछिल्लो १० महिनामा अमेरिकी डलरमा भित्रने रेमिट्यान्स १०.५ प्रतिशतले वृद्धि भई ९ अर्ब ९६ करोड पुगेको छ । अघिल्लो वर्ष यस्तो रेमिट्यान्स १४.८ प्रतिशतले बढेको थियो । यो अवधिसम्ममा खुद द्वितीय आय (खुद ट्रान्सफर) १४ खर्ब ७९ अर्ब ८ करोड पुगेको छ । अघिल्लो वर्षको सोही अवधिमा यस्तो आय १३ खर्ब १ अर्ब ७५ करोड रहेको थियो ।

या अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या ४ लाख ५ हजार ६१० र पुनः श्रम स्वीकृति लिनेको संख्या २ लाख ८० हजार ३१४ रहेको छ । अघिल्लो वर्षको सोही अवधिमा यस्तो संख्या क्रमशः ३ लाख ७३ हजार ३०७ र २ लाख ३६ हजार ३९८ रहेको थियो ।