प्रतिनिधि सभा

छलफलमा सहमति नजुटेपछि प्रतिनिधिसभाको बैठक आइतबारसम्मका लागि स्थगित

• गाउँ सहर संवाददाता
• २३ जेठ शुक्रबार, २०८२ | १५:२६:०० मा प्रकाशित

काठमाडौं । प्रतिनिधिसभाको बैठक बस्दै नबसी आइतबारसम्मका लागि स्थगित भएको छ। शुक्रबार दिँसो १ बजे बस्नेगरी तय भएको बैठक आइतबार दिउँसो १ बजेसम्मका लागि स्थगित भएको हो। 

भिजिट भिसा प्रकरणलाई लिएर विपक्षी दलहरूले सदन चल्न दिएका छैनन्। खुलाउने प्रयास विफल भएपछि शुक्रबार पनि बैठक बस्दै नबसी सारिएको हो। 

छानबिनका लागि उच्चस्तरीय आयोग बन्नै पर्ने अडान राखेका विपक्षी दलहरूले १३ गते देखि नै सदनमा अवरोध गर्दै आएका छन्। संवैधानिक व्यवस्था अनुसार १५ जेठमा बजेट प्रस्तुत गर्नैपर्ने भएकाले त्यसदिन भने उनीहरूले बैठक चल्न दिए। 

तर त्यसपछि प्रक्रियामा विपक्षी दलहरूले बैठकमा निरन्तर अवरोध जारी राखेका छन्। बैठक सञ्चालनका लागि सभामुखले पटक–पटक उनीहरूसँग छलफल गरे पनि सहमति जुटेको छैन।