गाउँ सहर

'कुनै पनि जिम्मेवारी लिन तयार छु' भन्दै पत्रकार सम्मेलन गरेर बिदा भए कुलमान घिसिङ

• गाउँ सहर संवाददाता
• २२ चैत शुक्रबार, २०८१ | १५:०१:०० मा प्रकाशित

काठमाडौं । नेपाल विद्युत् प्राधिकरणबाट हटाइएका कुलमान घिसिङले आफू अदालतको निर्णयलाई सम्मान गर्ने बताएका छन् । सरकारले प्राधिकरणबाट घिसिङलाई हटाएपछि उनी पुनर्वहालीका लागि अदालत गएका थिए । तर अदालतले उनको माग अनुसार मुद्दामा अन्तरिम आदेश दिन अस्वीकार गरेको थियो । 

शुक्रबार (चैत २२) काठमाडौंमा पत्रकार सम्मेलन गर्दै उनले आफू प्राधिकरणको कार्यकारी निर्देशकबाट मात्र बिदा भएको बताए । एक जिम्मेवार नागरिकका रूपमा आफ्नो काम, कर्तव्य र अभिभारा कहिल्यै कम नहुने उनले उल्लेख गरे ।

पत्रकार सम्मेलनमा राजनीतिमा आउने सम्भावनाबारे पत्रकारले सोधेको प्रश्नमा उनले आफू जिम्मेवार नागरिक भइसकेको भन्दै उनले जिम्मेवार नागरिकको हैसियतले देशको हितका लागि जुनसुकै जिम्मेवारी लिन तयार रहेको पनि बताए । 

‘म सदैव देशको हित र सम्मृद्धिको लागि कुनै पनि जिम्मेवारी लिन तयार छु’, घिसिङले कूटनीतिक जवाफ दिए ।

घिसिङले जनताको घरमा बिजुली पुर्‍याउनु नै आफ्नो कार्यकालको सबैभन्दा ठूलो उपलब्धि भएको बताएका छन् ।

आफूलाई बर्खास्त गर्नुलाई उनले राष्ट्रसेवक कर्मचारीलाई हतोत्साही र अपमानित बनाउने कार्यका रूपमा टिप्पणी गरे । “नेपाली जनतालाई भरपर्दो, गुणस्तरीय, पर्याप्त र सुरक्षित विद्युत् आपूर्ति उपलब्ध गराउने मुख्य उद्देश्यलाई इमानदारीपूर्वक पूरा गर्ने क्रममा खटिरहेको राष्ट्रसेवक कर्मचारीलाई हतोत्साही एवम् अपमानित बनाउने दुराशय सफल भएकोमा कतिपय व्यक्ति, समूह वा शक्तिले आफूलाई सफल ठानेका होलान्,” उनले भने, “तर, नेपाली जनताले दिएको स्नेह र आशीर्वादले मलाई हार्न दिएको छैन ।”

सरकारले बजेट नै नदिएको अवस्थामा समेत प्राधिकरणले आफ्नै स्रोतसाधनबाट विद्युतीकरणको काम गरिरहेको उनले बताए । आफ्नो कार्यकाल र भूमिकाप्रति असन्तोष हुनुपर्ने कुनै कारण नरहेको उनले सुनाए ।

“गाउँबस्तीको विद्युतीकरण मात्र हैन, स्थानीय निकायहरूसँगको साझेदारीमा स्मार्ट सडक बत्ती विस्तार गरी सहर उज्यालो बनाउने कार्यमा समेत ठूलो लगानी गरिएको छ,” उनले भने, “जनतालाई उज्यालो दिनु नै राष्ट्रहितविपरीतको अपराध हो ? यसको जवाफ देश र समाजले अवश्य खोज्नेछ भन्ने मेरो विश्वास छ ।”

बर्खास्त गरिएको दिन पनि आफू चेपाङ समुदायको बस्तीमा बत्ती बाल्ने कार्यमा तल्लीन रहेको उनले बताए । “मलाई हटाउन २०८१ चैत ११ गते मन्त्रिपरिषद् बैठकको तयारी भइहरेको दिन पनि म मकवानपुरको दुर्गम क्षेत्रमा सीमान्तकृत, विपन्न चेपाङ समुदायको बस्तीमा बत्ती बाल्ने काममा खटिएको थिएँ,” उनले भने ।

सार्वजनिक संस्थाको बक्यौता उठाउन खोज्दा सरकारले आफूलाई अपराधी बनाएको उनले आरोप लगाए । वर्तमान सरकारले प्राधिकरणलाई धराशायी बनाउन खोजेको उनको भनाइ थियो ।

मुलुकलाई ऊर्जामा आत्मनिर्भर बनाउँदै छिमेकी मुलुक भारत र बंगलादेशसम्म विद्युत् बिक्रीको प्रबन्ध गरेको उनले बताए । नयाँ मन्त्रिपरिषद् आउनासाथ अनावश्यक दबाब दिइएको उनले आरोप लगाए ।

“नेपालको संविधान तथा प्रचलित कानुनको परिधिभित्र रहेर निष्ठाका साथ देश र जनताको सेवामा आफूलाई समर्पित गर्न पाएकोमा मलाई गौरव महसुस भएको छ,” उनले भने ।

बक्यौता नउठाउन मन्त्री र प्रधानमन्त्रीबाटै फकाउने र गलाउने प्रयास भइरहेको उनले आरोप लगाए । संस्था र मुलुकप्रति आफू प्रतिबद्ध रहेको उनले बताए ।