गाउँ सहर

प्रदर्शनकारीद्वारा जडिबुटी उत्पादन तथा प्रशोधन कम्पनीका ९ वटा सवारी साधनमा आगजनी

• गाउँ सहर संवाददाता
• १५ चैत शुक्रबार, २०८१ | २०:०७:०० मा प्रकाशित

काठमाडौँ । कोटेश्वरस्थित जडिबुटी उत्पादन तथा प्रशोधन कम्पनी लिमिटेडको कारखानामा राजावादी प्रदर्शनकारीले लगाएको आगो अझै नियन्त्रणमा आएको छैन । सञ्चोलगायत औषधि उत्पादन गर्ने उक्त कारखानामा चार घन्टादेखि आगो नियन्त्रणमा नआएकाे हाे ।

राजावादीहरूले उक्त कारखानाको पार्किङमा रहेको ९ वटा सवारी साधनमा आगजनी गरेका थिए । तीनकुनेमा हिंसात्मक प्रदर्शनपछि तितरवितर भएका प्रदर्शनकारीले पेप्सीकोलातर्फ जाने चोकमा रहेको जडिबुटी कारखानामा आगो लगाएका थिए ।

मेडिकल व्यवसायी दुर्गा प्रसाईंको आह्वानमा शुक्रबार राजावादीहरूले प्रदर्शन र सभाको आयोजना गरेका थिए । तर सभा सुरू हुनुपूर्व नै प्रहरीसँग मुठभेडमा उत्रिएपछि तीनकुने क्षेत्रको प्रदर्शन हिंसात्मक बन्न पुगेको थियो ।

उत्तेजित राजावादीहरूले पार्टी कार्यालय, सञ्चार गृह र निजी घरमा समेत निशाना बनाएका थिए भने भाटभटेनीमा लुटपाटपनि गरेका थिए ।