वातावरण

उपत्यकामा हल्का वर्षा, अन्य जिल्लामा हिमपात

• गाउँ सहर संवाददाता
• १६ फाल्गुण शुक्रबार, २०८१ | १३:३४:०० मा प्रकाशित

काठमाडौँ । हिउँदयामको अन्तिम अवधिमा पश्चिमी न्यूनचापीय प्रणालीको प्रभावले काठमाडौं उपत्यकासहितका जिल्लामा वर्षा भएको छ । सुदूरपश्चिम र कर्णाली प्रदेशमा बढी प्रभाव रहेकाले बढी पानी परिरहेको छ । पूर्वतर्फ कम प्रभाव रहेकाले पानी पनि कम परेको छ ।

सबैभन्दा बढी वर्षा बैतडीमा भएको छ । गत २४ घण्टामा बैतडीको डिलासैनीमा ३९ मिलिमिटर र गोठालपानीमा ३४ मिलिमिटर वर्षा भएको छ । यसैगरी बाजुरामा ३८, जुम्लामा ३३ र कालिकोटमा ३० मिलिमिटर वर्षा मापन भएको छ ।

यस्तै कास्कीको माछापुच्छ्रे क्याम्पमा २४.८ मिलिमिटर वर्षा मापन भएको छ ।

जल तथा मौसम विज्ञान विभागको मौसम पूर्वानुमान महाशाखाका अनुसार ‘सुदूरपश्चिम र कर्णाली प्रदेशका धेरै स्थानहरुमा र गण्डकी, बागमतीका पहाडी भूभागका एक/दुई स्थानमा वर्षा भइरहेको छ ।’

उच्च पहाडी तथा हिमाली भेगमा हिमपात पनि भइरहेको छ । रुकुमपूर्वमा भारी हिमपातका कारण मध्यपहाडी लोकमार्गको लुकुम–पातीहाल्ना सडकखण्ड अवरुद्ध भएको छ ।

त्यस्तै हुम्लामा पनि बाक्लो हिउँ परेको छ ।

मौसम पूर्वानुमान महाशाखाका अनुसार काठमाडौँमा आज दिनभर नै पानी पर्ने र रोकिने क्रम जारी रहने छ । तर धेरै पानी भने पर्ने छैन । ‘काठमाडौंमा आज सिमसिम पानी पर्छ र दिनभर नै डिस्टर्ब होलाजस्तो देखिन्छ,’ महाशाखाले जनाएकाे छ ।