अर्थतन्त्र

के अब थामिएला शेयरबजार घट्नेक्रम ?

• गाउँ सहर संवाददाता
• २१ पौष आइतबार, २०८१ | १७:५८:०० मा प्रकाशित

काठमाडौं । निरन्तर घटिरहेकाे शेयरबजारमा पछिल्ला तीन कारोबार दिनदेखि बजार सामान्य अंकले बढ्दा लगानीकर्ताले राहत महसुस गरेका छन् । लगानीकर्ताहरु ‘पर्ख र हेर’को अवस्थामा रहेका अवस्थामा बजारले निरन्तर रुपमा सामान्य अंकले बढ्दा पनि उत्साहित हुनुपर्ने अवस्था देखिएकाे छ । 

साताको पहिलो कारोबार दिन आइतबार नेप्से परिसूचक सामान्य अंकले बढेर बन्द भएको छ । यसदिन नेप्से परिसूचक ५.३२ अंकले बढेर २५९१.५६ विन्दुमा कायम भएको छ  सामान्य अंकले बढेको बजारमा तीनवटा कम्पनीको सेयर १० प्रतिशतले बढ्यो । अपर लघुवित्त वित्तीय संस्था,दोर्दी खोला विद्युत कम्पनी र ग्रीन भेन्चर्सको सेयर १० प्रतिशतले बढेको हो । दोल्ती  पावरको सेयर ९.४४ प्रतिशतले बढ्दा ग्रीन डेभलपमेन्ट बैंकको ९.२४ प्रतिशतले बढ्यो ।

यसदिन नारायणी डेभलपमेन्ट बैंकका लगातीकर्ताले सर्वाधिक गुमाए । सो कम्पनीको सेयर ८.८८ प्रतिशतले घट्यो । कारोबार रकमका आधारमा जानकी फाइनान्स शीर्षस्थानमा रह्यो । सो कम्पनीको सेयर १९ करोड ९ लाख ४९ हजार  ९७७ रुपैयाँको सेयर कारोबार भयो । रिभर फल्स पावरको १७ करोड,रसुवागढी हाइड्रोपावर र एनआरएनको १२/१२ करोड र नेपाल फाइनान्सको ११ करोड मूल्य बराबरको सेयर कारोबार भयो ।

यसदिन ४ अर्ब ८६ करोड २ लाख १ हजार ९७४ रुपैयाँमा खरिदबिक्री भए । कारोबारमा आएका स्टक्समध्ये १४१ वटाको मूल्य बढ्दा ९४ वटाको घट्यो । ८ स्टक्सको मूल्य भने आज स्थिर रह्यो ।