शिक्षा

भृकुटीमण्डपमा जारी शैक्षिक मेलामा काठमाडौं महानगरकाे हस्तक्षेप

• गाउँ सहर संवाददाता
• ३२ जेठ बिहीबार, २०८० | १७:५२:०० मा प्रकाशित

काठमाडौं । भृकुटीमण्डपमा बिहीबारबाट आयोजना भइरहेको शैक्षिक मेलामा काठमाडौं महानगरले हस्तक्षेप गरेको छ । उच्च शिक्षालय तथा माध्यामिक विद्यालय संघ नेपालले आयोजना गरेको शैक्षिक मेलामा महानगरले हस्तक्षेप गरेको हो ।

एसईई दिएर बसेका विद्यार्थीहरुलाई लक्षित गर्दै उच्च शिक्षाबारेमा जानकारी दिन भन्दै क्याम्पसमा रिजल्ट अगावै अग्रिम सिट बुक गराउन लगाउने उद्देश्यले हरेक वर्ष आयोजना हुँदै आएको कार्यक्रममा महानगरले हस्तक्षेप गरेको हो ।

प्रक्रिया पूरा नगरी उच्च शिक्षालय तथा माध्यमिक विद्यालय संघ (हिसान)ले मेला सञ्चालन गरेको भन्दै महानगरले मेलामा राखिएका स्टलहरु हटाएको काठमाडौं महानगरका प्रहरी प्रमुख राजुनाथ पाण्डेले बताए ।

‘नतिजा नै नआइकन स्टल थापेर विद्यार्थी र अभिभावकलाई भर्नाको लागि लोभ्याउने, फोर्स गर्ने कार्य रोकेका छौं, अब स्टल बन्द भएको छ,’ नगर प्रहरी प्रमुख पाण्डेले भने ।

एसईई र कक्षा १२ को नतिजा कुरेर बसेका विद्यार्थी अभिभावकलाई लक्षित गरेर राखिएको हिसान मेला अनधिकृत रुपमा सञ्चालन भएको महानगरले जनाएको छ ।

नतिजा आउनु अगाडि नै मेला आयोजना गर्नु अनधिकृत भएकोले स्टल हटाएको महानगरको दाबी छ ।

विगत केही वर्षदेखि एसईईको परीक्षा सकिने वित्तिकै विभिन्न संघ तथा शैक्षिक संस्थाहरुका छाता संगठनहरुले यस्ता कार्यक्रम गर्दै आएका छन् । विद्यार्थीलाई आफ्नो कलेजमा नै पढ्न लगाउने गरि स्किम बाँड्ने, रिजल्ट अघि नै विद्यार्थीलाई भर्ना गर्ने प्रतिबद्धता गर्न लगाउने जस्ता कार्यहरु बढ्दै गएको भन्दै महानगर एक्सनमा उत्रिएको हो ।