राजनीति

सत्ता गठबन्धनमा भागबन्डा : कसलाई कुन मन्त्रालय, को बन्दैछ मन्त्री ?

• गाउँ सहर संवाददाता
• ३ माघ मंगलबार, २०७९ | १२:०६:०० मा प्रकाशित

काठमाडौँ । सत्ता गठबन्धनमा भागबन्डाको टुङ्गो लागे पछि प्रधानमन्त्री पुष्पकमल दाहाल प्रचण्डले आज  मन्त्रिपरिषद् विस्तार गर्दै छन् । शपथ दिउँसो १ बजे हुने तय गरिएको छ ।

नेकपा माओवादी केन्द्रले प्रधानमन्त्री, चार मन्त्री र एक राज्यमन्त्री पाउने भएको छ । प्रधानमन्त्रीमा प्रचण्ड र उपप्रधान एवं  भौतिक पूर्वाधार तथा यातायात मन्त्रीमा नारायणकाजी श्रेष्ठ,थप तीन मन्त्रीमा रेखा शर्मा, सुदन किराँती र अमनलाल मोदीले अवसर पाउने भएका छन् । शर्मालाई सञ्चार, किराँतीलाई संस्कृति, पर्यटन तथा नागरिक उड्डयन र मोदीलाई सङ्घीय मामिला तथा सामान्य  प्रशासन मन्त्रालयको  दिइने र एक राज्यमन्त्रीको भने टुङ्गो लाग्न बाँकी छ ।

एमालेले ८ मन्त्री र २ राज्यमन्त्री पाउने गरी सहमति भएको छ । एमालेबाट विष्णु पौडेलले उपप्रधान तथा अर्थमन्त्रीको रूपमा शपथ खाइसकेका छन् ।  मन्त्रीहरूमा पदम गिरी,   भगवती चौधरी,  हरि उप्रेती र  बलराम अधिकारी छन् ।  दुई राज्यमन्त्रीमा  किरण साह र  राजकुमार गुप्ता रहेको एमाले स्रोतले बताएको छ । यसअघि विष्णु पौडेलसहित ज्वाला कुमारी साह, राजेन्द्र राई र दामोदर भण्डारीले मन्त्रीको सपथ लिएका छन् । एमालेले परराष्ट्र, स्वास्थ्य, रक्षा, कृषि, भूमि व्यवस्था, उद्योग र महिला बालबालिका मन्त्रालय पाउने सम्भावना छ । 

राष्ट्रिय प्रजातन्त्र पार्टी (राप्रपा) ले  अध्यक्ष राजेन्द्र लिङ्देनको नेतृत्वमा पार्टी सरकारमा जाने निर्णय भएको जानकारी छ । जसअनुसार लिङ्देन उपप्रधानमन्त्रीसहित ऊर्जा मन्त्री बन्ने,  ध्रुवबहादुर प्रधान कानुन न्याय तथा संसदीय मामिला मन्त्री, विक्रम पाण्डे सहरी विकास मन्त्री बन्ने र दीपकबहादुर सिंह ऊर्जा राज्यमन्त्री बन्ने भएका छन् ।

राष्ट्रिय स्वतन्त्र पार्टी (रास्वपा)ले प्रचण्ड नेतृत्वको सरकारमा  पार्टी सभापति रवि लामिछानेले नेताहरुसँग परामर्शको आधारमा मन्त्री फाइनल गरेका हुन् । एक नेताका अनुसार श्रममन्त्री डोलप्रसाद अर्याल, शिक्षा मन्त्री शिखिर खनाल, डा तोसिमा कार्की स्वास्थ्य तथा जनसंख्या राज्यमन्त्री र लामिछाने उपप्रधान तथा गृहमन्त्री भइसकेका छन् ।