स्वास्थ्य

जनमासमा फैलँदै काेराेना : एकैदिन थपिए ८९५ जना संक्रमित, एककाे मृत्यु

• गाउँ सहर संवाददाता
• १६ श्रावण सोमबार, २०७९ | १६:३८:०० मा प्रकाशित

काठमाडौं । दिनहुँ बढिरहेकाे काेराेना भाइरस संक्रमण जनमासमा फैलिँदै गएकाे देखिएकाे छ । 

पछिल्लो २४ घण्टामा ८९५ जनामा कोरोना भाइरस संक्रमण पुष्टि हुनुले उक्त कुरा प्रमाणित हुन्छ ।

स्वास्थ्य तथा जनसंख्या मन्त्रालयका अनुसार ५ हजार ९०९  परीक्षणमा ८९५ जनामा संक्रमण पुष्टि भएको हो । ३ हजार ६५८ पीसीआर परीक्षणमा ६३२ जना र २ हजार २२४ एन्टिजेन परीक्षणमा २६३ जनामा संक्रमण पुष्टि भएको छ ।

पछिल्लो २४ घण्टामा २६४ जना संक्रमणमुक्त भएका छन् ।

मन्त्रालयका अनुसार कोरोना संक्रमणका कारण पछिल्लो २४ घण्टामा १ जनाको मृत्यु भएको छ । हाल देशभर कोरोना भाइरसको सक्रिय संक्रमितको संख्या चार हजार ९३४ रहेको छ ।

पछिल्लो २४ घण्टामा काठमाडौं उपत्यकामा ४५६ जना कोभिड १९ संक्रमित थपिएका छन् । आज काठमाडौंमा ३७३, भक्तपुरमा १७ र ललितपुरमा ६६ जना संक्रमित थपिएका हुन् ।

योसँगै काठमाडौं उपत्यकामा सक्रिय संक्रमितको संख्या तीन हजार ४४५ पुगेको छ ।