राजनीति

शेखर समूहले १४ चैतमा तरुण भेला गर्दै

• गाउँ सहर संवाददाता
• ११ चैत शुक्रबार, २०७८ | १६:२९:०० मा प्रकाशित

काठमाडाैं । तरुण दल र नेपाल विद्यार्थी संघको अध्यक्ष नियुक्तिको विरोधमा नेपाली कांग्रेसका नेता शेखर कोइराला समूहले तरुण दलकाे छुट्टै भेलाको आयोजना गर्ने भएको छ ।

शेखर समूहले चैत १४ गते दिउँसो १ बजे अनुपम फुड्ल्याण्डमा भेलाको आयोजना गरेको हो ।

गत बुधबार सभापति शेरबहादुर देउवाले नेविसंघको तदर्थ कार्यसमितिको अध्यक्षमा दुजाङ शेर्पा र तरुण दलको अध्यक्षमा विद्वान गुरुङलाई तोकिएका थिए । सभापतिले एकलौटी निर्णय गरेको भन्दै शेखर पक्ष असन्तुष्ट छ ।

‘सभापतिज्यूले एकलौटी रूपमा नेविसंघ र तरुण दलको सभापति मनोनीत गरेको विषयप्रति हाम्रो गम्भीर आपत्ति छ,’ नेविसंघका पूर्वसभापति रञ्जित कर्णले भने, ‘त्यसको प्रतिवाद गर्नका लागि १४ चैतमा काठमाडौंमा अलग भेला राखेका छौं ।’

सो भेलामा नेविसंघका पूर्व अध्यक्षदेखि देशैभरिका प्रतिनिधिहरू उपस्थित हुने जनाइएकाे छ ।