गाउँ सहर

६ महिनामा ४२ अर्ब ६२ करोड रुपैयाँको खाद्यान्न आयात

• गाउँ सहर संवाददाता
• १२ माघ बुधबार, २०७८ | ०८:४३:०० मा प्रकाशित

काठमाडाैँ । चालु आर्थिक वर्षको ६ महिनामा ४२ अर्ब रुपैयाँको खाद्यान्न आयात भएको छ ।

भन्सार विभागको तथ्यांक अनुसार सो अवधिमा ४२ अर्ब ६२ करोड रुपैयाँको खाद्यान्न आयात भएको हो ।

मुलुकमा यो वर्ष धान उत्पादन घट्दा ठूलो परिणाममा खाद्यान्न आयात भएको हो । ४२ अर्बको खाद्यान्न आयात हुँदा २७ अर्बको चामल आयात भएको विभागको तथ्यांक छ ।

यस्तै ६ महिनामा मुलुकमा २२ अर्ब ५१ करोड रुपैयाँको तरकारी र १२ अर्ब आठ करोड रुपैयाँको फलफूल आयात गरेको छ । ७८ अर्ब रुपैयाँको घिउ, तेल र पशुपक्षीजन्य वस्तु आयात भएको छ । पाँच अर्ब रुपैयाँको चिया, कफी, चार अर्ब ९५ करोड रुपैयाँको चिनी, १५ अर्ब रुपैयाँको खाद्यान्न उद्योगका लागि चाहिने कच्चा पदार्थ चाहिने कच्चा पदार्थ र झन्डै दुई अर्ब रुपैयाँको पेय पदार्थ आयात भएको विभागले जनाएको छ । यस्तै ४० अर्ब रुपैयाँको औषधी र कच्चा पदार्थ, १० अर्ब रुपैयाँको बिउबिजन, ३६ अर्ब रुपैयाँको प्लास्टिकलगायतका वस्तु आयात भएको छ ।

भारत, चीन, मलेसिया, फिलिपिन्स, ताइवान, कोरिया, इन्डोनेसियालगायतका देशबाट २६ अर्ब ९० करोड रुपैयाँ भन्दा धेरैको चामल आयात भएको भन्सार विभागको तथ्यांकमा उल्लेख छ ।

६ महिनामा नेपालको वैदेशिक व्यापार घाटा आठ खर्ब ८० अर्ब ४९ करोड रुपैयाँ रहेको भन्सार विभागले जनाएको छ । ६ महिनामा नेपालले नौ खर्ब ९९ अर्ब रुपैयाँको वस्तु आयात गरेको छ । यस्तै एक खर्ब १८ अर्ब ८५ करोड रुपैयाँको वस्तु निर्यात भएको छ ।

यो वर्ष बेमौसमी वर्षाको कारणले गर्दा यो वर्ष झन्डै ५ लाख टन धान उत्पादनमा कमी आएको छ । गत असोज ३१ र कात्तिक १-२ मा परेको वर्षाले बाली सखाप पारेको थियो ।

कृषि तथा पशुपंक्षी मन्त्रालयका अनुसार २०७८/०७९ मा १४ लाख ७७ हजार ३ सय ७८ हेक्टरमा धान रोपाइँ भएकोमा धान उत्पादन ८.७४ प्रतिशतले घटेर ५१ लाख ३० हजार टनमा झरेको छ । अघिल्लो वर्षको तुलनामा ४ लाख ९१ हजार ८५ टन कमी भएको मन्त्रालयले जानकारी दिए । गत वर्ष ५६ लाख २१ हजार ७ सय १० टन धान उत्पादन भएको थियो ।

अघिल्लो वर्ष १४ लाख ७३ हजार ४ सय ७४ हेक्टरमा रोपाइँ भएको थियो । यो वर्ष समयमै मनसुन सक्रिय भएपछि गत वर्षको तुलनामा ३ हजार ९ सय ४ हेक्टर बढी क्षेत्रफलमा रोपाइँ भएको थियो ।