कला

मिस युनिभर्सको उपाधि भारतकी हरनाज सन्धूलाई

• गाउँ सहर संवाददाता
• २७ मङ्सिर सोमबार, २०७८ | १३:११:०० मा प्रकाशित

काठमाडौँ । ७०औं मिस युनिभर्सको उपाधि भारतकी हरनाज सन्धूले जितेकी छन् ।

यसअघि सन् २००० मा भारतबाट लारा दत्तले मिस युनिभर्सको उपाधि जितेकी थिइन् ।

लाराले उपाधि जितेको २१ वर्षपछि भारतकी अर्की सुन्दरी सन्धूले इजरायलको इलियटमा आयोजित प्रतियोगितामा उपाधि जितेकी हुन् ।

पञ्जाबकी २१ वर्षीया सन्धू मोडलिङका साथै केही पञ्जाबी चलचित्रमा समेत काम गरेकी छिन् ।

जनप्रशासनमा स्नातकोत्तर तहमा अध्ययनरत सन्धूलाई मेक्सिकोकी पूर्व मिस युनिभर्स एन्ड्रिया मेजाले ताज पहिराइदिएकी थिइन् ।

पाराग्वेकी नादिया फेरेइराले फस्ट रनरअपको उपाधि जितिन् भने दक्षिण अफ्रिकाकी लालेला स्वानले सेकेन्ड रनरअपको उपाधि जितेकी छन् ।

हरनाजले यसै वर्षको अक्टोबरमा मिस युनिभर्स इन्डिया उपाधि जितेकी थिइन् ।