गाउँ सहर

सर्वोच्चमा आज तोकियो १० वटा इजलास

• गाउँ सहर संवाददाता
• २ मङ्सिर बिहीबार, २०७८ | १२:४७:०० मा प्रकाशित

 काठमाडाैं । सर्वोच्च अदालतमा बिहीबार १० वटा इजलास तोकिएको छ । प्रधानन्यायाधीश चोलेन्द्र शमशेर जबराले आफ्ना लागि भने कुनै इजलासमा राखेका छैनन् ।

आजको १० वटा इजलासबाट २५९ वटा मुद्दा पेसीमा राखिएको छ । न्यायाधीशहरूले बन्दी प्रत्यक्षीकरणबाहेकका मुद्दामा सुनुवाई नगर्ने घोषणा गरे पनि सबै प्रकारका मुद्दामा पेसी तोकिएको हो ।

 जबराले आजै ‘फुलकोर्ट’ राख्ने तयारी गरेका छन् । सर्वोच्चका न्यायाधीशले फुलकोर्ट राखेर नियमावली संशोधन गर्दै गोलाप्रथाबाट पेसी तोक्न दबाब दिँदै आएका थिए ।

सर्वोच्चका न्यायाधीश र बार एशोसिएसनले केही सातादेखि प्रधानन्यायाधीशको राजीनामा माग गर्दै आन्दोलन गरिरहेका छन् । यसैबीच प्रधानन्यायाधीश जबराले पेलेरै इजलास राख्दै आएका छन् ।