कला

चित्रकलामा राईजिङ्ग स्टारकी सुस्मिता प्रथम

• गाउँ सहर संवाददाता
• २६ कार्तिक शुक्रबार, २०७८ | २०:३६:०० मा प्रकाशित

पोखरा । शुक्रबार नगेन आर्ट एकेडेमीमा सम्पन्न चित्रकलामा राईजिङ्ग स्टारकी सुस्मिता श्रेष्ठ प्रथम भएकी छन् ।

लायन्स क्लब अफ पोखरा नर्सेसको आयोजनामा पोखरामा रहेका विद्यालयलाई समेटेर ‘वि अल आ कनेक्टेड’ शीर्षकमा ११ देखि १३ वर्षसम्मका विद्यार्थीहरुको पिस पोस्टर चित्रकला प्रतियोगिता २०७८ सम्पन्‍न भएको हो ।

प्रतियोगितामा सोयंका गुरुङ्ग हिलपोइन्ट सेकेन्डरी स्कुल, वन्दना कुमाल नव प्रभात माध्यमिक विद्यालय र सोनी पुर्जा पुन हिलपोइन्ट सेकेन्डरी स्कुलले द्वितीय, तृतीय र सान्त्वना स्थान प्राप्त गरेका थिए । उनीहरुले  नगेन आर्ट एकेडेमीका आर्ट क्लासमा ५०%  र २५% छुट सहित ट्रफी, मायाको चिनो र प्रमाणपत्र प्राप्त गरे ।

क्लबका एसिस्टेन्ट चिफ एडभाईजर अर्जुन थापाले विद्यार्थीहरुको उज्वल भविष्यको कामना गर्दै कलामा निरन्तर लाग्न आग्रह गर्दै नेपालमा पनि अहिले अभिभावककले आफ्ना सन्ततिलाई चित्रकलामा लाग्न हौसला दिन थालेको बताए ।

कार्यक्रममा विश्व कलायात्री प्राज्ञ नगेन सिंहले नेपाल भरको लायन्स क्लबहरुले यो प्रतियोगीता गरेर उत्कृष्ट भएका विद्यार्थीको कलालाई काठमाण्डौं पठाउने र नेपालभरबाट उत्कृष्ट भएकोलाई अमेरिका पनि पठाउने भएकोले यस कार्यक्रमले विश्वमा पनि नेपालको नाम राख्न सफल भएको बताए । 

निर्णायक संयोजक वरिष्ठ चित्रकार गोपाल श्रेष्ठ,लायन्स क्लबको कास्कीका जोन चियरपर्सन बलराम पहारी पिस पोष्टर कन्टेष्टका सेन्टर कोर्डिनेटर शम्भु बास्तोलाले पिस पोष्टर कन्टेष्टको र लायन्स क्लबको महत्वका बारेमा बोलेका थिए ।

लायन्स क्लब अफ पोखरा नर्सेसको अध्यक्ष गिता जोशीको अध्यक्षतामा सम्पन्न कार्यक्रम उपाध्यक्ष निशा श्रेष्ठको स्वागत  सरु प्रधानको सञ्चालनमा भएको थियो ।