गाउँ सहर

अविरल वर्षाका कारण प्रदेश १ का विभिन्न जिल्लामा धानबालीमा क्षति, जनजीवन प्रभावित

झापा । अविरल वर्षाका कारण प्रदेश १ का विभिन्न जिल्लामा पाक्ने बेला भएको धानबालीमा क्षति पुगेको छ । खाेलानाला भरिएका छन् । दैनिक काम प्रभावित भएकाे छ भने जनजीवन असहज भएकाे छ ।

विराटनगर १ स्थित कृषि विकास निर्देशनालयका अनुसार आइतबार बेलुकाको हावापानी र सोमबार रातिदेखि परेको अविरल वर्षाले धानखेती प्रभावित भएको छ ।

बाली पाक्ने बेलामा भएकाे वर्षाले कति क्षति गर्याे, त्यसकाे पूर्ण तथ्यांक ननिस्किएकाे निर्देशनालयले जनाएकाे छ । उसका अनुसार- वर्षा जारी छ ।

यता माैसम विभागले पनि आज २०७८ कार्तिक ०२ गते मंगलवार, दिउँसो देशभर सामान्य देखि पूर्ण बदली रहने छ। सुदूरपश्चिम, कर्णाली, गण्डकी र लुम्बिनी प्रदेशका धेरै स्थानहरुमा साथै प्रदेश १ र बागमती प्रदेशका केही स्थानहरु तथा प्रदेश २ का थोरै स्थानहरुमा मेघगर्जन चट्याङ्गसहित हल्का देखि मध्यम वर्षाको सम्भावना रहेको छ ।

देशका उच्च पहाडी तथा हिमाली भूभागहरुका केही स्थानहरुमा हल्का देखि मध्यम हिमपातको समेत सम्भावना छ । सुदूरपश्चिम प्रदेशका केही र प्रदेश १, लुम्बिनी, कर्णाली प्रदेशका थोरै स्थानहरूमा भारी वर्षाको समेत सम्भावना रहेको बताएकाे छ ।

यस्तै राति देशभर सामान्य देखि पूर्ण बदली रहने छ । देशका धेरै स्थानहरूमा हल्का देखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागहरुका थोरै स्थानहरुमा  हल्का देखि मध्यम हिमपातको समेत सम्भावना छ ।

प्रदेश १ र लुम्बिनी प्रदेशका थोरै स्थानहरू गण्डकी, कर्णाली र सुदूरपश्चिम प्रदेशका एकदुई स्थानमा  मेघगर्जन चट्याङ्ग भारी वर्षाको समेत सम्भावना रहेको समेत विभागले बताइसकेकाे छ ।

गाउँ सहर संवाददाता

तपाईँको मत