खेल

साफ च्याम्पियनसिप फुटबलमा आज नेपाल र भारतबीच ‍ प्रतिस्पर्धा गर्दै

काठमाडौं । साफ च्याम्पियनसिप फुटबलमा आज नेपाल र भारतबीच ‍ प्रतिस्पर्धा हुँदैछ ।

 नेपालले भारतविरुद्ध माल्दिभ्सको मालेस्थित राष्ट्रिय रंगशालामा नेपाली समय अनुसार राति ९ः४५ बजे खेल्नेछ ।

नेपाली राष्ट्रिय फुटबल टोलीका प्रशिक्षक अब्दुल्लाह अल्मुताइरीले भारतविरुद्ध खेल्दा उनीहरूलाई सम्मान गर्ने तर डराएर नखेल्ने बताएका छन् ।

नेपाल पहिलो दुई खेल जितेर ६ अंकका साथ शीर्ष स्थानमा छ । दुई खेलबाट दुई अंक जोडेको भारत चौथो स्थानमा छ । भारतलाई अब फाइनलमा स्थान बनाउन बाँकी खेल जित्नैपर्ने दबाब छ ।

भारतले सबैभन्दा धेरै सातपटक प्रतियोगिताको उपाधि जितिसकेको छ । यस संस्करणमा पनि भारत उपाधिको प्रमुख दाबेदार हो । तर, पहिलो दुई खेलमा अप्रत्यासित नतिजा आएपछि भारत दबाबमा छ । 

नेपालका प्रशिक्षक अल्मुताइरीले आजको खेलमा भारतलाई हराउने नेपालको सम्भावना एक प्रतिशत मात्र रहेको बताएका छन् ।

'भारतविरुद्धको खेलका लागि राम्रो तयारी गरेका छौँ । भारतविरुद्धको खेल कठीन छ । हामी चरणबद्ध अघि बढी रहेका छौँ । हामीले दुई चरण पार गरिसकेका छौँ,' कप्तान किरणले प्रि-म्याच कन्फरेन्समा भने, 'लक्ष्य पूरा गर्नका लागि अर्को चरण रहेको छ । हामी जित्नका लागि ९० मिनेटसम्म प्रतिस्पर्धा गर्छौं ।'

यसअघिका भारतसँगका २१ खेलमा नेपाल १४ मा हार, ५ मा जित र २ खेल बराबरीमा सकिएका थिए ।

पछिल्लो पटक नेपालले भदौमा भारतसँग दुई मैत्रीपूर्ण खेल खेलेको थियो । दशरथ रंगशालामा नेपालले एक खेल बराबरी खेल्दा एक खेलमा हार व्यहोरेको थियो ।

गाउँ सहर संवाददाता

तपाईँको मत