अर्थतन्त्र

शेयरबजारका कुरा : रकम र संख्यामा नयाँ कीर्तिमान कायम, १७ अर्ब बढिकाे काराेबार

• गाउँ सहर संवाददाता
• २३ जेठ आइतबार, २०७८ | १५:३६:०० मा प्रकाशित

काठमाडौं । साताको पहिलो कारोबार दिन आइतबार सेयर बजारमा दुई नयाँ कीर्तिमान कायम भएको छ । नेप्सेले आज हालसम्मकै उच्च कारोबार र उच्च विन्दुमा पुगेर नयाँ कीर्तिमान कायम गरेको हो ।  

लगानीकर्ताहरुको आकर्षण बैंकिङ क्षेत्रमा हुँदा लगानीकर्ताको उत्साह थपिँदै गएकाे देखिन्छ ।

यसदिन नेप्से परिसूचक ५०.१३ अंकले बढेर २८०६.८९ अंकमा पुगेर बन्द भएको छ । आइतबारको कारोबारमा नेप्से हालसम्मकै उच्च अंक २९१९.१० अंकसम्म पुगेको थियो ।

त्यस्तै, आज ३ करोड ७४ लाख ५५ हजार १८९ कित्ता सेयर १७ अर्ब २७ करोड १७ लाख रूपैयाँमा कारोबार भएको छ । यो हालसम्मै उच्च कारोबार हो । यसअघि २०७८ जेठ १६ गते आइतबार १७ अर्ब २ करोड ८४ लाख बराबरको करोबार भएर नयाँ रेकर्ड कायम गरेको थियो । 

यो दिन ९९ वटा कम्पनीको सेयर मूल्य बढेको छ भने ११३ वटा कम्पनीको सेयर मूल्यमा गिरावट देखिएको छ भने ६ वटा कम्पनीको सेयर मूल्य स्थिर छ ।

यो दिन महिला लघुवित्तको सेयरमा १० प्रतिशतको सकारात्मक सर्किट लागेको छ भने गुडविल फाइनानस, लुम्बिनी विकास बैंक र रिडी हाइड्रोपावर डेभलपमेन्ट कम्पनीको सेयर मूल्य ९ प्रतिशत भन्दा बढिले बढेको छ ।

त्यस्तै, आज राधी विद्युत कम्पनीका लगानीकर्ताले सर्वाधिक गुमाएका छन् भने कारोबारको आधारमा आज सबैभन्दा बढी कारोबार नेपाल रि–इन्स्योरेन्स कम्पनी भएको छ ।