गाउँ सहर

राष्ट्रियसभा सदस्य उपनिर्वाचनको मतगणना सुरु

• गाउँ सहर संवाददाता
• ६ जेठ बिहीबार, २०७८ | १६:५४:०० मा प्रकाशित

काठमाडौं  । वाग्मती प्रदेशअन्तर्गत आज भएको राष्ट्रियसभा सदस्य उपनिर्वाचनको मतगणना सुरु भएको छ । मतगणना निर्वाचन अधिकृतको कार्यलयमा भर्खरै सुरु भएको हो ।

बिहीबार हेटौँडाको भुटनदेवी माविमा भएको निर्वाचनमा ३३८ जनाले मतदान गरेको सहायक मतदान अधिकृत गोविन्दप्रसाद पौडेलले जानकारी दिए ।

जसमा प्रदेशसभाका १०५ र स्थानीय तहका गाउँपालिका अध्यक्ष, उपाध्याक्ष, नगरपालिकाका प्रमुख, उपप्रमुख २३३ जनाले मतदान गरेको उनले बताए । जसमा २५ जना कोरोना संक्रमित मतदाताले मतदान गरेका छन् ।

वाग्मतीमा प्रदेशसभातर्फ ११० र स्थानीयतर्फ २३८ गरी ३४८ मतदाता थिए । जसमा प्रदेशसभा सदस्य पशुपति चौलागाईंको मृत्यु भएको थियो । त्यस्तै, तीन प्रदेशसभा सदस्य रहेको विवेकशील साझा पार्टीले भने मतदानमा सहभागी नहुने निर्णय गरेको थियो ।

उपनिर्वाचनमा तीनजना उमेदवार छन् । नेकपा (एमाले)का तर्फबाट गृहमन्त्री रामबहादुर थापा ‘बादल’, नेपाली कांग्रेस, नेकपा माओवादी केन्द्र, जसपाको तर्फबाट डा. खिमलाल देवकोटा र नेपाल मजदुर किसान पार्टी (नेमकिपा)बाट कृष्णबहादुर तामाङ उमेदवार रहेका छन् । बादल र खिमलालबीच मुख्य प्रतिष्पर्धा छ ।

मतदानको अन्तिम नतिजा आजै भर्चुअल माध्यमबाट सार्वजनिक गर्ने तयारी रहेको पौडेलले जानकारी दिए ।