स्वास्थ्य

कोरोना संक्रमणबाट पछिल्लो २४ घण्टामा ८ जनाको मृत्यु, थपिए १ हजार ९६, निकाे भए २६२

काठमाडौँ । नेपालमा कोरोना संक्रमित गम्भीर विरामीको संख्या ह्वात्तै बढेको छ । स्वास्थ्य तथा जनसंख्या मन्त्रालयका अनुसार अहिले ११६ जनाको आइसियूमा, ४६ जनाको भेन्टिलेटरमा उपचार भइरहेको छ । 

देशमा १ हजार १०६ आइसियू र ४६१ भेन्टिलेटर मात्र छन् ।

देशमा अहिले कुल सक्रिय संक्रमितको संख्या ६ हजार २९० रहेको छ ।

पछिल्लो २४ घण्टामा ५ हजार ८४ पिसिआर विधिबाट र ६२९ को एन्टिजेन विधिबाट कोरोना टेस्ट भएको छ । जसमा दुबै गरेर १०९६ संक्रमण पुष्टि भएको छ ।

मन्त्रालयका अनुसार पछिल्लो २४ घण्टामा नेपालमा ८ जना कोरोना संक्रमितको मृत्यु भएको छ । योसहित कुल मृतकको संख्या ३ हजार ८३ पुगेको छ । 

नयाँ संक्रमित १ हजार ९६ जना थपिएका छन् । थपिएकासहित कुल संक्रमितको संख्या २ लाख ८४ हजार ६७३ पुगेको छ ।

काठमाडौँ उपत्यकामा मात्र, भक्तपुरमा ४५, ललितपुरमा ६४ र काठमाडौँमा ३२६ संक्रमित पछिल्लो २४ घण्टामा थपिएका छन् । 
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा स्वास्थ्य लाभ गर्नेको संख्या २६२ छ । योसहित कुल स्वास्थ्य लाभ गर्नेको संख्या २ लाख ७५ हजार ३०० पुगेको छ । 

मन्त्रालयका अनुसार आजसम्म २३ लाख ४५ हजार ५०१ जनाको पिसिआर टेस्ट भएको छ । अहिले देशभरका आइसोलेशनमा ६ हजार २९० र क्वारेन्टाइनमा रहनेको संख्या ८५ छ ।

छिमेक राष्ट्रहरुमा संक्रमण बढेसँगै मन्त्रालयले सावधानी अपनाउन आग्रह गरेको छ । सीमा नाकामा कडाईसँगै चेकजाँच समेत बढाइएको छ । पछिल्लो समय देशमा संक्रमितको दर बढ्दो छ ।

यति हुँदापनि विद्यालय र यातायात बारे सरकारले बन्द र जोरविजोर गर्ने कुनै निर्णय गरेको छैन ।

गाउँ सहर संवाददाता