राजनीति

कर्तव्यनिष्ठ नेताहरुको अभावले पार्टी र समाजलाई अपूरणीय क्षति : राप्रपा

• गाउँ सहर संवाददाता
• १२ माघ सोमबार, २०७७ | ०९:२९:०० मा प्रकाशित

पाँचथर । राष्ट्रिय प्रजातन्त्र पार्टी (राप्रपा) पाँचथरले कर्तव्यनिष्ठ जिल्ला नेताहरुको अभावले पार्टी र समाजलाई अपूरणीय क्षति भएको बताएको छ ।

'सिद्धान्तनिष्ठ, वचनका पक्का र स्थानीय तहका कुशल संगठनकर्ता कृष्णबहादुर योङहाङ, जीतबहादुर अगुवा र हर्कबहादुर नेम्बाङको असामयिक निधनले पार्टी र सिंगो समाजलाई अपुरणीय क्षति भएको छ । पार्टीले यस्ता जिम्मेवार नेता कार्यकर्ता जन्माउनु धेरै लगानी र परिश्रम गनु पर्ने हुन्छ,' केन्द्रीय कार्य सम्पादन सदस्य सगुन सुन्दर लावतीले फिदिमस्थित राप्रपा पार्टी कार्यालयमा आयोजित श्रद्धान्जली सभालाई सम्बोधन गर्दै भने ।

दिवंगत जिल्ला नेताहरुको सुकिर्ती भावी पुस्ताका लागि मार्गनिर्देश हुने नेता लावतीले बताए ।

राप्रपा पाँचथरका जिल्ला उपाध्यक्ष कृष्णबहादुर योङहाङ, जिल्ला सदस्यहरु जीतबहादुर अगुवा र हर्कबहादुर नेम्बाङको स्मृतिमा आयोजित श्रद्धान्जली सभामा वक्ताहरुले दिवंगत नेताहरुको योगदान र व्यकि्तत्वबारे चर्चा गरे ।

विकासप्रेमी नेता स्वर्गीय पद्मसुन्दर लावतीका सहयात्रीका रुपमा योङहाङ, अगुवा र नेम्बाङले पाँचथरमा लामो समय क्रयाशील राजनीति गरे । आफ्नो जिम्मेवारी पूरा गर्ने नेताका रुपमा तीनैजना स्थापित थिए, केन्द्रीय सदस्य मानदेव केरुङले सो अवसरमा भने ।

राप्रपा पाँचथरका अध्यक्ष राजकुमार जोशीको अध्यक्षतामा सम्पन्न श्रद्धान्जली सभामा राप्रपा ताप्लेजुङका अध्यक्ष डिल्ली विष्ट, उपाध्यक्ष गायत्री थेबे र राप्रपा इलामका जिल्ला सदस्य भवानी योङयाको समेत उपसि्थति थियो ।

राप्रपा हिलिहाङ अध्यक्ष जीतबहादुर कटवाल, हर्कबहादुर नेम्बाङकी सुपुत्री अप्सना नेम्बाङले श्रद्धान्जली अर्पण गर्दै मन्तव्य प्रस्तुत गरेका थिए ।