गाउँ सहर

मुना कार्कीको उपचारको क्रममा स्टार अस्पताल सानेपामा मृत्यु

• गाउँ सहर संवाददाता
• २७ माघ सोमबार, २०७६ | १४:३४:०० मा प्रकाशित

काठमाडौं ।  पूर्वसचिव अर्जुन कार्कीकी श्रीमती मुना कार्कीको उपचारको क्रममा स्टार अस्पताल सानेपामा मृत्यु भएको छ । अस्पतालका निर्देशक शाहील रुपाखेतीले उपचारका क्रममा उनको मृत्यु भएको जानकारी गराए ।

आफ्‍नै घरको भान्छा कोठामा घाइते अवस्थामा फेला परेकी पूर्व सचिव अर्जुन कार्कीकी श्रीमती मुना कार्कीको उपचारको क्रममा सानेपास्थित स्टार अस्पतालमा निधन भएको छ । ललितपुर उपमहानगरपालिका-२, सानेपामा रहेको घरको भान्छा कोठामा गम्भीर घाइते अवस्थामा फेला परेकी कार्कीको टाउकोमा गहिरो चोट लागेको थियो । घटनास्थलमा पुगेको प्रहरीले उनको उद्धार गरी स्टार अस्पताल पुर्‍याएको थियो।

सानेपास्थित निवासमा कार्कीको घरमा रहेका कामदार विजय चौधरी पनि बिहान मृत अवस्थामा फेला परेका थिए । दाङ स्थायी घर भएका चौधरी डाइनिङ रुममा झुण्डिएको अवस्थामा मृत भेटिएका थिए ।

अस्पताल प्रशासनले जानकारी दिए अनुसार श्रीमती कार्कीको टाउकोमा धेरै गम्भीर चोट लागेको छ भने घाँटी र हातमा पनि निलडामको घेरा देखिन्छ। आइतबार बिहान पशुपति दर्शन गरेर फर्किने क्रममा कार्कीले श्रीमतीलाई रगत लतपतिएको अवस्थामा फेला पारेका थिए भने कामदार मृत अवस्था फेला पारेका थिए ।

परिसरका मुद्दा शाखाका डिएसपी सन्तोष तामाङका अनुसार अहिले घटनास्थलको मुचुल्का गर्ने कार्य भइरहेको छ। सो क्रममा भान्छा कोठामा रहेको टेबुलमा साग र मोबाइल फोन फेला परेको छ भने चौधरी डाइनिङ रुममा झुण्डिएको अवस्थामा भेटिएका थिए।

प्रारम्भिक अनुसन्धानका क्रममा कामदारले नै उनको हत्या गरेको हुनसक्ने आशंका गरिएको प्रहरीले जनाएको छ । प्रहरीले थप अनुसन्धान भइरहेको बताएको छ।