खेल

मलेसियालाई हराउदै नेपाल एसीसी यू–१९ प्रिमियर कप क्रिकेटको फाइनलमा

• गाउँ सहर संवाददाता
• १३ मङ्सिर शनिबार, २०८२ | १५:२६:०० मा प्रकाशित

काठमाडौं । एसीसी यू–१९ प्रिमियर कप क्रिकेटको फाइनलमा पुगेको छ । ओपनिङ बलरद्वय नितेशकुमार पटेल र चन्दन रामले उत्कृष्ट बलिङ प्रदर्शन गरेपछि नेपालले यूएईमा भइरहेको प्रतियोगितामा शनिबार सेमिफाइनलमा मलेसियालाई ९ विकेटले पराजित गर्‍यो ।

नेपालले टस जितेपछि ब्याटिङको निम्तो पाएको मलेसिया अजमान स्थित सेभेन ड्रिस्ट्रिक ग्राउन्ड २ मा केवल १७.२ ओभर खेली ५१ रनमा धराशायी भएको थियो । नितेशले ८ ओभरमा २ मेडन राख्दै २४ र चन्दनले ५ ओभरमा १ मेडन राख्दै १७ रन खर्चेर ३ विकेट लिए । अपराजित पौडेल कप्तान अशोक धामी र रोशन विश्वकर्माले १–१ विकेट लिए ।

मलेसियाबाट नवौं नम्बरमा ब्याटिङ गरेका मोहम्मद फाथुल मुइनले ११ र हम्जाह पांगीले १३ रन बनाउनु बाहेक अन्यले दोहोरो स्कोर बनाउन सकेनन् । मलेसिया आठौँ ओभरमा १३ रन बनाउँदा ७ विकेट गुमाईसकेको अवस्थामा यी दुईले इनिङ्सलाई केही लम्बाएका थिए ।

निरजकुमार यादव ४ रनमा आउट भए पनि नेपालले ८ ओभर भित्रै ५५ रन बनाए । वंश क्षेत्री १७ बलमा ७ र निश्चल क्षेत्री १४ बलमा १० रन बनाई अविजित रहे ।

साउदी अरेबिया र हङकङलाई पराजित गर्दै नेपाल समूह विजेता भएर सेमिफाइनल पुगेको थियो । शनिबार नै भइरहेको यूएई र ओमानबीचको अर्को सेमिफाइनलको विजेतासँग नेपालले फाइनल खेल्ने छ ।