राजनीति

ओलीलाई टक्कर दिन ईश्वर पोखरेलकाे अध्यक्षमा तयारी

• गाउँ सहर संवाददाता
• ५ मङ्सिर शुक्रबार, २०८२ | ०६:५१:०० मा प्रकाशित

काठमाडौं । नेकपा एमालेका वरिष्ठ उपाध्यक्ष ईश्वर पोखरेलले सचिवालय बैठकमा भावी अध्यक्षमा दाबी प्रस्तुत गर्दै प्रतिस्पर्धा गर्न तयार रहेको जानकारी गराएका छन् ।

पोखरेलले ओलीलाई नेतृत्वबाट बिदा लिएर अभिभावक बन्न आग्रह गरेका थिए ।

उनले सकेसम्म आफूलाई सर्वसम्मतका लागि सघाउन ओलीलाई आग्रह गरे ।

ओलीले नेतृत्व सर्वसम्मत चयन गरौँ भन्दै नत्र स्वस्थ प्रतिस्पर्धाका लागि तयार रहेको बताएका थिए ।

झलनाथ, माधव, भीम रावलहरूको उदाहरण दिँदै ओलीले विगतमा प्रतिस्पर्धाबाट हारेकाहरूले टुटफुट र पार्टी विभाजनसम्मको गतिविधि गरेको उदाहरण दिँदै एकढिक्का भएर जानुपर्ने अहिलेको अवस्थामा त्यस्तो नहोस् भन्दै सचेत गराएका छन् ।

उपमहासचिव प्रदीप ज्ञवालीले भने- अध्यक्षज्यूले अहिले पार्टी, आन्दोलन र राष्ट्रकै सामु भइरहेका चुनौती सामना गर्न एकताको महाधिवेशनको रूपमा लैजाऔँ । अहिले आम पार्टी पंक्तिले पनि चाहेको कुरा यही हो । यति हुँदाहुँदै पनि यदि कसैले प्रतिस्पर्धा गर्ने भए स्वस्थ प्रतिस्पर्धा गर्न सकिन्छ भन्नुभएको छ ।

आजको बैठक झण्डै ८ घण्टा चल्यो । नेताहरूले महाधिवेशन, राजनीतिक घटनाक्रम र पार्टीको अबको रणनीतिबारे आ-आफ्नो भनाइ राखेका थिए ।