राजनीति

‘एक रुपैयाँको भ्रष्टाचार प्रमाणित भए राजनीतिबाटै बिदा लिन्छु’ - गृहमन्त्री लेखक

• गाउँ सहर संवाददाता
• १० जेठ शनिबार, २०८२ | २०:०९:०० मा प्रकाशित

काठमाडौँ । गृहमन्त्री रमेश लेखकले आफ्नो राजनीतिक जीवनमा एउटा मात्रै पनि आर्थिक अनियमितता प्रमाणित भए पदबाट मात्रै नभई राजनीतिबाटै राजीनामा दिने बताएका छन् ।

शनिबार साँझ काठमाडौँमा सञ्चारकर्मीहरूसँग संक्षिप्त कुराकानी गर्दै उनले त्रिभुवन अन्तर्राष्ट्रिय विमानस्थलको अध्यागमन कार्यालयसँग जोडिएको भिजिट भिसा प्रकरणमा आफूविरुद्ध नियोजित ढंगबाट झुटा प्रचारबाजी भइरहेको गम्भीर आरोप लगाए ।

उनले भने, ‘मेरा विरुद्ध नियोजित र षड्यन्त्रपूर्वक झुटा प्रचारहरू भइरहेको छ । म सबैलाई आग्रह गर्न चाहन्छु- त्रिभुवन अन्तर्राष्ट्रिय विमानस्थलको अध्यागमनको भिजिट भिसा मात्रै होइन, मेरो सम्पूर्ण सार्वजनिक र राजनीतिक जीवन हेरेर मूल्याङ्कन गरियोस् । यदि एउटा मात्रै पनि आर्थिक अनियमितता प्रमाणित भयो भने म पदबाट होइन, राजनीतिबाटै राजीनामा दिन तयार छु ।’