अर्थतन्त्र

यस्ताे छ नेपाल टेलिकमको ९ महिनाको आम्दानी

• गाउँ सहर संवाददाता
• ५ जेठ सोमबार, २०८२ | १२:३३:०० मा प्रकाशित

काठमाडौं । सरकारी स्वमित्वको कम्पनी नेपाल टेलिकमको नाफा ४८.६७ प्रतिशतले घटेको छ ।

नेपाल टेलिकम लिमिटेडले सार्वजनिक गरेको चालु आर्थिक वर्ष २०८१/८२ को तेस्रो त्रैमास (चैत मसान्त) सम्मको वित्तीय विवरण अनुसार खुद नाफा २ अर्ब ८४ करोड २२ लाख रुपैयाँ खुद नाफा रहेको छ र यस्तो नाफा गत वर्षको सोही अवधिको तुलनामा ४८.६७ प्रतिशले घटेको छ । गत आर्थिक वर्षको सोही अवधिसम्ममा कम्पनीले ५ अर्ब ५३ करोड ७५ लाख रुपैयाँ खुद नाफा कमाएको थियो।

टेलिकमको ब्याज आम्दानी ४६ प्रतिशत घटेको छ । पहिले ब्याजवापत ५ अर्ब १९ करोड रुपैयाँ आम्दानी गरेको कम्पनीले अहिले २ अर्ब ८० करोड ३५ लाख रुपैयाँ मात्रै आम्दानी गरेको छ ।

टेलिकमले टेलिकम सेवा बेचेर गरेको आम्दानी पनि २५ अर्ब ४८ करोड रुपैयाँबाट केही घटेर २५ अर्ब ३१ करोड रुपैयाँ कायम भएको छ ।

यसको कुल आम्दानी भने ३१ अर्ब २० करोड रुपैयाँ रहेकोबाट घटेर २८ अर्ब ४३ करोड रुपैयाँमामा सिमित भएको छ ।
नाफासँगै कम्पनीको प्रतिसेयर आम्दानी घटेको छ । वार्षिक प्रतिसेयर आम्दानी जम्मा २१ रुपैयाँ ५ पैसामा खुम्चिएको छ । गत वर्ष वार्षिक प्रतिसेयर आम्दानी ४१ रुपैयाँ थियो ।

१८ अर्ब रुपैयाँ चुक्ता पुँजी रहेको टेलिकमको जगेडा कोषमा ७२ अर्ब ७० करोड रुपैयाँ सञ्चित छ । कम्पनीको प्रतिसेयर नेटवर्थ ५०३ रुपैयाँ ९३ पैसा छ भने मूल्य आम्दानी अनुपात ४२.७४ गुणा रहेको छ।