प्रविधि

एमपोस मार्फत रिचार्ज गर्दा नेपाल टेलिकमका ग्राहकलाई ८ जीबीसम्म डेटा बोनस

• गाउँ सहर संवाददाता
• १९ मङ्सिर बुधबार, २०८१ | १५:४९:०० मा प्रकाशित

काठमाडौं । नेपाल टेलिकमले मोबाइल प्वाइन्ट अफ सेल (एमपोस) मार्फत गरिने रिचार्जमा विशेष बोनस योजना सार्वजनिक गरेको छ । मङ्गलबारदेखि १७ पुससम्म लागू हुने यस योजनाअन्तर्गत ग्राहकले रिचार्ज रकमअनुसार विभिन्न आकर्षक बोनस पाउने कम्पनीले जनाएको छ ।

रु. ५० देखि ९९ रुपैयाँसम्म रिचार्ज गर्दा तीन दिनसम्मको लागि २० मिनेट अन-नेट भ्वाइस बोनस पाइनेछ । त्यस्तै, रु. १०० देखि १९९ रुपैयाँसम्म रिचार्ज गर्दा तीन दिनसम्मको लागि ५० मिनेट अन-नेट भ्वाइस बोनस उपलब्ध हुनेछ ।

यस्तै, रु. २०० देखि ४९९ रुपैयाँसम्म रिचार्ज गर्ने ग्राहकरूले दुई दिनसम्म प्रतिदिन १ जीबीका दरले २ जीबी डाटा प्राप्त गर्नेछन् । रु. ५०० वा सोभन्दा बढी रिचार्ज गर्ने ग्राहकले चार दिनसम्म प्रतिदिन २ जीबीका दरले ८ जीबी डाटा बोनसका रूपमा पाउनेछन् ।

नेपाल टेलिकमले आफ्ना ग्राहकलाई डिजिटल माध्यमको प्रयोगमार्फत रिचार्ज गर्न प्रोत्साहन गर्ने उद्देश्यले यो योजना ल्याएको हो । स्टेसनरी पसल, किराना पसल, पत्रिका पसल लगायतबाट एमपोस सेवा लिन सकिन्छ ।

त्यसैगरी, ब्यालेन्स सकिएको अवस्थामा प्रिपेड मोबाइल प्रयोगकर्ताहरूका लागि 'नमस्ते सापटी' सुविधा पनि उपलब्ध छ । यसका लागि ग्राहकले Start टाइप गरी १४७७ मा सन्देश पठाउने वा *1477# डायल गरी १ छनोट गरेर सापटी लिन सक्छन् ।